Майтрея (Майдыр) бурганнын ооредиглери

Экии, хүндүлүг номчукчулар! Силерниң кичээнгейиңерге Будда Шакьямуниниң соонда кээр деп кижи төрелгетенниң манап турганы амгы үениң буддазы Майтреяның (Майдырның) 1928-1938 чылдарда Е. И. Рерихти таварыштыр орус дылда бижиттирип каан, бистиң амгы үевиске хамаарышкан «Агни Йога» деп өөредиинден ушта бижилгелерни бараалгадыр-дыр мен. "Агни" дээрге "от" дээн, "Йога" дээрге "өөредиг" дээн уткалыг. "Оттуг өөредиг" дээн хевирлиг. Ол Будданың өөредии ышкаш, эртем-философтуг өөредиг болур.  

Өөредиг дугайында

Майдыр Бурганның "Агни Йога" деп өөредиин "Учение жизни", "Живая этика" деп база адап турар. Ол 16 бичежек томнардан тургустунган. Ол томнарны болгаш Майдыр Бурганның бодун үстүнде чуруктан көрүп болур силер. Өөредиг 10 өөредигден тургустунган:

• Морияның садының бүрүлери

• Община

• Агни Йога

• Кызыгаар чок Делгем (2 кезектиг)

• Иерархия

• Чүрек

• Оттуг Делегей (3 кезектиг)

• Аум

• Акы-дуңмалышкы ёзу
• Үстүү Делегей

    Майтрея ( Майдыр) Бурганның чуруун үстүнде көрдүңер, ол херек апарган таварылгаларда кижилерге ындыг хевирлиг кижи кылдыр көстүп кээп турар.

Эгезинде үш өөредигни маңаа салып турган мен. Ам Иерархия деп өөредигни салыр-дыр мен. Иерархия дээрге Бурганнар Иерархиязы. Агни Йога өөредиин долузу-биле салыры болдунмас, чүге дээрге хемчээли улуг болгаш блог аартай бээр. 

Иерархия

Кызыгаар Чок Делгемниң чалгыгларынче шымны бергеш, шуурганга үзе соктурган чечекке дөмейлежи бээр бис. Кызыгаар Чок Делгемниң далайынга чаартынган кылдыр боттарывысты канчап тып алыр бис?           

Хемени башкарыкчы чокка чорудары – мерген угаан эвес-тир. Ынчалза-даа Орук Айтыкчызы хуусаазында чедип келир, чүректиң тургузукчу ажылы тамыже тайлы бербес. Чырык орукта орук айтыр демдектер дег, чорумалды өөрү үнериниң чадазынче үндүреринге кеээде белен турар кижи төрелгетенниң Акылары уйгу-чыдын чок, сергек турарлар.

Иерархия дээрге албадал эвес, а Өртемчейниң хоойлузу-дур. Кыжаныг эвес, а чүректиң кыйгызы болгаш сагындырыг база Бүгүдениң Чаагай Чоруунга чагыг-сүме-дир. Чырыктың Иерархиязын ынчаар билип аалыңар. 

Ажыг чүүлдү канчаар чигирзиг кылыптарыл? Чуртталганы үстүү делегейниң медерелинче Иерархиядан өске кым-даа шилчидип шыдавас.  Кызыгаар Чок Делгемче эртер көвүрүгнү быжыг чагылары чок кылдыр бодаары берге. Ынчангаш Иерархия көвүрүгнүң быжыг чагылары дег, Чырыктың ындыы эриинче кежире бээр. Каракты чылчырыктадыптар Чырыктың чырыын угааныңарга бодаңар, база Чырыктың Ырызын билиңер!  Чырык болгаш Иерархия дээш ажылдаалыңар!

 1. Өөредиглер дугайында дыка хөй чугаалаттынган. Ынчалза-даа кижи төрелгетен Акыларының (Шамбаланың Бурган-Башкыларының. Ш. Ондар) өөредиин канчаар хүлээп алырын билбес. Ылап шынга дүүшпес хажыдыышкыннар кайы хире хөй ийик! Кайы хире хөй принциптер үреттинген ийик! «Акыларның Чөлеңгиижи чүнүң кырында туттунуп турарыл?»-деп айтырарлар. Чүректиң өөредии, күш-ажылдың өөредии, чараш чүүлдүң өөредии, хөгжүлдениң өөредии, күжениишкинниң өөредии, эң-не амыдыралчы өөредиг!»-деп чугаалаңар.

Бистер Кызыгаар Чок Делгемниң салгакчылары Бис. <…> Бис делгемни хөгжүлдениң агымы-биле долдуруп турар Бис. Кижи төрелгетенниң Акылары эң-эки чаданың үндезининче эки-тура-биле чүткүвүшаан, кижилерниң хөгжүлдезин тургузар дээш, Паранирванадан ойталап турарлар. Сорулга күш-ажыл чокта чедип алдынмас, Сорулга бериишкин чокта боттанмас. Майтреяның чедип кээри чоокшулаан – деп, айтыңар!       

Кажан кижи төрелгетен өөредигниң үндезинин чидирип алгаш, чүве билбезинче шымны бээрге, ынчан буруңгу Башкыларның баш удур чугаалап кааны дег, Майтреяның эпохазы дүжүп кээр!                                         

Бистиң үндезиннеривис сагыш-сеткилди чаартырынче угланган, чүве билбес кижилерге ынчаар чугаалаңар. Чүректиң Өөредиин оларга айтып бериңер!                                                                                                                                 

3. Архаттың чүрээ Октаргайның чүрээнге дең. Архаттың чүрээ хүннүң одунга дең. Архаттың чүрээ Октаргайның мөңгези-биле болгаш ооң шимчээшкини-биле долуп турар. (Архат дээрге - кижи болуп чурттап чорааш, чырык угаанны, бедик сайзыралды алгаш, Чер кырынга катап төрүттүнмес эргени алган, Бурган апарган кижи. Чүгле Черниң кижилери эвес, колдуу өске планеталарның кижилери болур. Ш. Ондар). Майтрея кээп турар болгаш бүгү-ле оттары-биле чырып турар. Ооң чүрээ бүгү ядараан кижи төрелгетенге кээргел-биле хып турар, ооң чүрээ чаа эге-үндезиннер тургузары-биле чырып турар. <…>                                                         

4. Бистиң Иерархиявыс чалбырааштыг хоойлу-биле чурттап болгаш өзүп турар. Бистер, Архаттар, чуртталганың одунга өөрүп турар Бис, оон-даа артык – хөгжүлдениң чалбыыжының улгадып турарынга. Планетада Чер кырының чуртталгазы-биле санажып, доозуп турар келир үениң Архаттары Бистерге, Архаттарга, кады-ажылдакчылар болурлар. Иерархияга немелде келирге, Октаргай байырлалы болур. Хоойлу чаңгыс, мөңге. Хоойлуну Октаргай тургускан. <…>                                                                                                  

Шамбаланың Баштыңчы Бурган-Башкызы

5. Шамбаланың Делегей Караа кижи төрелгетенге Чаагай Чорукту, Экини берип турар. Шамбаланың Делегей Караа кижи төрелгетенниң оруунга Чырык ышкаш. Шамбаланың Делегей Караа бүгү дилеп чоруур кижилерни башкарып чоруур Сылдыс-тыр.                                                                                       

Чамдык кижилерге Шамбала – Ылап Шын, чамдыктарынга – хоозун бодал (утопия). Чамдык кижилерге Шамбаланың Баштыңчы Бурган-Башкызы анаа кырган ашак, чамдыктарынга – сеткили ханган бай. Өскелеринге Шамбаланың Баштыңчы Бурган-Башкызы каастап каан Бурган дүрзүзү. Чамдыктарынга Шамбаланың Баштыңчы Бурган-Башкызы планеталар башкарыкчызы сүлделерниң удуртукчузу. Ынчангаш Бис чугаалаар Бис: Шамбаланың Баштыңчы Бурган-Башкызы – Чуртталганың болгаш Делегейниң Иезиниң Одунуң Оттуг Шимчедикчизи. (Делегейниң Иези дээрге Иерархияның бажында кыс Бурган. Ш. Ондар). Ооң тыныжы чалбырааш-биле хып турар болгаш Ооң Чүрээ «Мөңгүн Лотостуң» оду-биле чалбыраашталып турар. Шамбаланың Баштыңчы Бурган-Башкызы Хүннүң Чүрээнде тынып болгаш чурттап турар. Шамбаланың Баштыңчы Бурган-Башкызы Кыйгырып Турар болгаш боду Кыйгырткан. Шамбаланың Баштыңчы Бурган-Башкызы бодунда согуннарлыг болгаш бүгү согуннарны бодунга хүлээп ап турар! Шамбаланың Баштыңчы Бурган-Башкызы Ылап Шын-биле тынып турар, Ылап Шынны тургузуп турар. Шамбаланың Баштыңчы Бурган-Башкызы кырывас, өлбес болгаш үрелген чүүлдерни катап тургузуп турар! Шамбаланың Баштыңчы Бурган-Башкызы Бедик Тук болгаш Чуртталганың Шыпшык Бажы! Шамбаланың Баштыңчы Бурган-Башкызын Чуртталганың Үлегер-Демдээ кылдыр хүлээп алыңар. Үш катап – Чуртталганың-деп чугаалаар Мен, чүге дээрге, Шамбала дээрге кижи төрелгетенниң чүткүлүнүң Үндезини. Бистиң Барывыс – кижи төрелгетенниң сайзыралының Үндезини. Бистиң Барывыс – Кызыгаар Чок Делгемче тургустунган орук-тур!                                                                    

Архаттар

12. Кижи төрелгетен кажан-даа Архаттың амыдырал-чуртталгазының дугайында бодавайн чораан. Архатты булуттарда деп бодап чоруурлар бар. Ооң дугайында кижилерниң бодалы коргунчуг болгаш каттырынчыг. Бистер, кижи төрелгетенниң Акылары, кижилерниң бодалындан боттарывысты танывайн турар Бис. Бистиң овур-хевиривис ында фантастика-биле дөмей. <…> Бис арыннарывысты чүгле чоок кижилеривиске көргүзүп боор Бис. Бис херелдеривисти чүгле эң чоок кижилеривисче чорудуп болур Бис. Ылап, ылап, ылап!

13. <...> Майтреяның эпохазы херээжен кижини көдүрүп турар. Майтреяның кээри эрткен үеде, амгы үеде, келир үеде-даа Делегейниң Иезин алдаржыдары-биле холбашкан. <…>

17. Кижилер Шамбаланы анаа дыштаныыр оран деп бодап алгаш, харыысалга дугайын дыка эвээш бодап чоруурлар! Кижи төрелгетенниң Акылары кижилерниң медерелиниң хилинчектиг аар-бергезин чүктеп чоруур деп олар билгеннер болза! Оларның бодалдары дээш харыысалганы Чүктеп Чоруурувусту билгеннер болза! Бир эвес кижилер Шамбала дээрге кижи төрелгетенге эң-эки чаданы тургузуп турар Үндезин-Дөс деп билгеннер болза! …Планета оттуп кээр ужурлуг. Октаргай манап турар! <…>

18. <…> Силерниң хоойлуңар кижиниң каржы чоруунга үндезилеттинген, Бистиң хоойлувус Делегейниң Иезиниң Чүрээнге үндезилеттинген!

23. Чагырга дугайында шын дыңнаан-дыр силер. Ылап-ла, Иерарх октаргай сайзыралынга бодунуң эрге-чагыргазын ажыглап турар. (Иерарх — Бурганнар Иерархиязының Баштыңчы Бурганы. Ш. Ондар). Бистер, кижи төрелгетенниң Акылары, Октаргай Сорунзазы-биле кады чоруп олура, ындыг күчүлүг Бис. Ылап-ла, күженген чүрээвис-биле чаяап, тургузуп турар Бис деп бадыткап тур Мен. Чаңгыс эп каттыжыышкынын билир Бис. Октаргайның чаяакчы, тургузукчу ажылы база Угаан-Сарыылдың Чүрээниң күжениишкини-биле чаяап, тургузуп турар. Ылап, ылап, ылап! Бо хоойлу Угаан-Сарыылдың бадыткалы. Октаргай ынчаар тургузуп турар, ылап, ылап, ылап!

Делегейниң Иези, Сеңээ Боттуг Амыдыралдың хоойлузу билдингир. Сеңээ, Чагырыкчы, Бистер, кижи төрелгетенниң Акылары, күдүк базып, мөгейип, хүндүлеп тур Бис. Сени, Сени, Сени! Өртемчейде каттышкан чүрек ынчаар хааннап турар, ылап, ылап, ылап!

Карма билиин билбеске…

24. Кижи бодунга дыка хам-хайыра чок. Бодунуң салым-чолунга хыйланып, хомудаар, а боду бодунга кадыг-дошкун кеземче онаап ап турарын уттуп алыр. Карма дугайында бодалга чаңчыктырары Биске дыка берге, тамыже дорт–ла бар чыдар кижиниң медерели оон-даа берге. Кижилер угаан-медерелин чырыдып, чүве билип ап, медерелин сайзырадып алырындан боттарын чок кылып алырын азы боттарын боттары мегелээри дээре деп санаарлар. 

Шамбаланы дилээри сүзүк хүрээлеңнеринде аңгы-аңгы. Ылап-ла, кижилер Шамбаланың Общиназын халдаашкын-биле азы чем чивес шээр-биле тып алыр бис деп бодап турарлар бе? Бисче баар орукту билир кижиге чугаалаар Бис: « Күш-ажылдың оруу-биле чору, бүзүрелдиң камгалалы-биле чору». Бистиң Овур-Хевиривисти бодунуң чүрээнде тып алган кижиге чугаалаар Бис: «Чүрээң-биле чору, ынчан «аяк» орукту тып бээр». Бот-тогдунуушкун-биле орукту тып алган мен деп бодап чоруур кижиге: «Төнчүзүн билир кижиден барып өөренип ал» - деп, чугаалаар Бис.

<…> Билиг дээрге – хөгжүлдеге эң-эки бериишкин, өргүл-дүр. <…>                     

31. Чогумчалыын билири дээрге Бистиң-биле кады ажылдажылганың демдээ. Оон өскээр аңгы-аңгы чурттарже чоруткан Сорунзаларны канчап билип алырыл? Оон өскээр кижилерниң медерелин сорунза ышкаш бодунче тыртыптар, ыыт чокка бүдүн чоннүң караан бодунче ээлдириптер байдалче канчап чоокшулаарыл? Шак ынчаар Бистиң чоруткан эр, кыс дуңмаларывыс бүдүн чоннарның медерелин боттарынче, боттарын долгандыр канчаар тыртып турарын көрүп болур. Маңаа базым бүрүзүнүң үнелиин кичээнгейлиг билир болза эки. 

38. Кижиниң сүлдезиниң, тура-соруунуң өзеринге берге байдалдар херек. Кижиниң хилинчек-човулаңындан эртине даштар тыптыр деп буруңгу чугаа бар. Ол ылап-ла шын, ынчангаш кажан Мен – Менче чүдүрүңер-деп чугаалап турумда, Бодумну өргүп азы Бодум когарап турарым ол эвес, а сүлдемниң күжүн улгаттырып турарым ол. <…>

Чер кырынга катап төрүттүнериниң харыысалгазын болгаш ажыктыын билир үе келген. Ынчалза-даа кижилер Октаргайның каъттарындан кээп турар үннерни болгаш аңаа харыыларны база делгемниң чалгыгларын дыңнаар хөңнү чок. Сагыш-сеткил, сүзүк сайзыралының ажыктыының дугайында катап-катап чугаалап-ла турар Бис, ынчалза-даа бо херек дыка багай чоруп турар, харын-даа, эки сеткилдиг, бодунуң ажыын хараар кижи безин сагыш-сеткилдиң чырык талазынга хамаарышкан чүүлдер дугайында чугаалаарындан коргар. Сагыш-сеткилдиң чаагайының дугайында, билигниң чырыының дугайында чугаалаарын шенеп көрүңер-даан, силерден үптекчилер, дээрбечилерден дег, коргар апаарлар. Үптекчи дээрбечилер безин Христостуң, Будданың өөреникчилери чорааннар, ынчангаш кижилерниң шолазындан кортпаңар, Ачы-Буянны, Чаагай Чорукту болгаш Чырыкты бээр Мөңге Чүүлдүң Үнүн дыңнап чоруңар. Кортпаңар! Кортпаңар! Кортпаңар!

39. Октаргайның чаяакчы, тургузукчу ажылы кезээде бүгү энергияларның күжениишкини-биле болуп турар. Ынчангаш күжениишкин кайы хире күштүг болдур, тиилелге оон-даа күчү-күштүг болур. Бистиң чогаадыкчы, тургузукчу ажылывыс күчү-күштүң шынары-биле долдунар. Ынчангаш бүгү энергияларны чыып алгаш, чедиишкинни манап болур бис. Чүгле энергияларның шынары күш-ажылдың херек чадазын бээр. Ынчангаш делгем медерелдиг болуру дыка чугула болгаш аңаа бүгү тудуг-тургузуушкунга херек чүүлдерни киирип, бодап чорууру чугула.

40. Мээң күзел-соруумну күүсеткеш, бодуңнуң күзел-сорууңну күүседип бээр арганы Меңээ бээр сен. Чырыкче чүткээн кижилерниң күзел-соруунуң аразында кызыгаары кайдал? Бистер биске бүзүрээн кижилерни шенеттинген Сорунзаларның оруу-биле эдертип олурар бис деп чүвени сактып ап болур. Океан, далайларны кезип каапкан корабль Башкарыкчызынга бүзүреп болур. «Көвүрүгнү эртип, бодуңну шенеп көр. А Мээң Сылдызым чүс чылдарны эртип, билип алган”. Дадыккан чүрекче коргуушкун кирбес болзун!

42. Ынчангаш Бистиң Планывыс ындыг күчү-күштүг, ынчангаш Бистиң Чагыывыс оон-даа күштүг, чүге дээрге сөстеривис чуртталгаже кайгамчык бадыткалдар кылдыр кирип турар. Ынчангаш Бистиң Сөзүвүс ынчаар чурттап турар, чүге дээрге оттуң күчүзү сиңген. Кажан чүгле Бистиң Чагыывысты чуртталгага ажыглаанда, дээди чаданы тургузуп болур.  

Силерниң шупту даалгаңар күүселдези чүге ындыг дээштиг болуп турарыл? Чүге дээрге ында Бистиң Кады-Ажылдажылгавыстың магадылалы бар. Шак ынчаар, Бис, салгал хоойлузунга Иерархияны тургузуп турар Бис. Ынчангаш кажан Октаргай хоойлузу медереп билдине бээрге, Иерархияның илчирбе-дизииниң билиишкини тургустуна бээр. Ынчаар эң эки күүседикчи кижи Иерархга чоок апаар. Чүгле Дээдиниң Күзел-Соруун күүседири – Бараан Болурунуң Иерархиязы болур.

Бодалдың шынары

44. Боттанган бодал бүрүзү оттуг чогаадыкчы тургузуушкунга салыышкын болур. Ынчангаш боттанган бодал бүрүзү Бистиң ажыл-херээвиске катчы бээр. Өөреникчилер боттарының бодалдарынга бодунуң ажыын бодаарының шыйлашкыны, азы бот-тогдунары, азы менээргенир чорук кире бербээн бе деп, шүгдүнүп, бодалдарының шынарын оваарымчалыг хынап   чоруур ужурлуг. Шын миннип билирин кижи бүрүзү сайзырадыыр ужурлуг. Чүгле ынчаар Баштыңчы Бурганнарның Планының даалгазын күүседип болур. Иерархияның илчирбе-дизии Дээдиниң Күзел-Соруун күүседири-биле тургустунар.

45. Делгемниң оттары бодалдың күжениишкининге харыылап турар, бодалдың шынары ол хире күчү-күштүг. Кажан деңзигүүрлүг тааржылга тургустуна бээрге, чүгле ынчан октаргай тургузуушкунун боттандырып болур. Шак ынчаар тааржылга бүрүзү бодунуң түңнелин эккеп турар. Дыыжы чорукту сайзырадыырында медерелди делгемчидериниң үндезини чыдып турар. Ынчангаш чүткүлдүң шынары дээрге сагыш-сеткил өзүлдезиниң эң шын көргүзүкчүзү болгаш медерел чогаадыкчы ажылдың тургускан күжү ышкаш болуп турар.

46. Бодалдың шынары дилээшкинниң чаягаар чүткүлү-биле ынчаар күженип турар. Сүлдениң чогаадыкчы ажылы оттуң күжү-биле күженип турар, ынчангаш Бистиң ажылдакчыларывыс чогаадыкчы бодалдың бүгү күчүзүн медереп билир болгаш оттарны кыпсыыр ужурлуглар. Шак ынчаар чүгле бодалдың шынары медерелди делгемчидип, сайзырадып болур. Бистиң ажылдакчыларывыс ынчаар сактып чорзуннар.

47. Бир Йогту улус баштак кижи дээр турган, чүге дээрге ол бажыңнарда чүүлдерни улус көрбээнде, турган черинден өскээр салып каар турган. «Чүге?»-деп айтырыгга: «Согур апарбаан силер бе? – дээш, хайгаарап турарым ол-дур»-деп харыылаар турган. Шынап-ла, долгандыр турар чүүлдерниң өскерли бергенин эскерер кижилер эвээш, а «Эзир Карааның» бирги демдээ – бичии-ле өскерилген чүүлдерни эскерери, чүге дээрге оон бүгү чүүлдерниң үндүрүп турар чалгыгларының канчаар сирлеңнээри хамааржыр.

48. Иерархияның күчү-күжү эң-не амыдыралчы, чүгле бо көвүрүг-биле тудуп, тургузуп болур. Өндүр улуг эгелээшкиннер бүрүзүнүң дөзүнде Иерархия хоойлузу-биле долу сиңген энергия чыдып турар. Чүгле эң чоок каттыжылга хоойлузу-биле тудуп, тургузуп болур. Чүгле Иерархияның Эге-Үндезинин тургускан үндезин-дөске дээди арганы тургузуп болур. Каттышкан медерел дугуржулганың шиитпирин берип турар деп Чогаадыкчы Тура-Сорук айтып турар.

49. Кичээнгейни бөдүүн аргалар-биле хынап болур. Бир чүүлдү өске черге салып калыңар, бир эвес ону эскербес болза, чүүлдүң хемчээлин улгаттыргаш, хайгаараңар, «көскү карак» кайы чаанны эскерип каар эвес. Ниитизи-биле, коргуушкунга удур-даа, кылыкка удур-даа, чалгаага удур-даа болгаш өске-даа таварылгаларда шенеңер, кажан лакмус саазыны ыяткаш, кыза бээр эвес. Нарын чөңгээлерниң херээ чок, ынчалза-даа бөдүүн кичээнгейлиг чорук хөй чадаларже буруңгаарладыптар. Шак ынчаар «Эзир караан» кылып эгелээр херек!

50. <…> Амыр-дыш деп чүве чок болгаш төнчүзү база чок деп чүвеге чаңчыгары – мерген угаан болур. Ынчалза-даа Бистиң Акыларывыс болгаш Иерархия бар деп чаңгыс медерел чорук кижизин дорт орук-биле Кызыгаар Чок Делгемче углап турар.

Багай бодал бодавас

57. Кудукку, багай бодалдарны чииртим соястаар амытаннар кылдыр чуруп турган. Чүү-даа чүве медерелдиң ол шаарланчак чүүлүнге дөмейлешпес. Сандай адаанда шагар чыланнар, скорпионнар бар деп чүвени билип олура, аңаа шөлээн олурары болдунар бе! Ол соястаарлардан адырлыыр херек, эң ылаңгыяда Иерархия шугумунуң талазы-биле. Баштыңчы   Бурганны бактаар болза, эттинмес частырыг болур. Иерархты бактаан кижи бүрүзү ооң бодал чок, сиилең чоруу болгаш кем-херээ дыка хөй чылдар иштинде ооң кармазын хирлендирип каар деп сактып алыр болза эки. Шынап-ла, чаңгыс Чырыкче Баштыңчы Бурган таварыштыр чаңгыс орук бар болганда, чүгле эң мелегей чорук ол орукту үреп кааптып болур. Дээдиже чүткүлдү чуртталганың утказы кылдыр салып алыр болгаш бо камгалал бээр чүткүлге хамаарылганы ыдыктыг кылдыр хүлээп алыр болза эки. Иерархты куду   көргеш, бодун шиидип, кеземче ап болур болгаш хөй чоок кижилеринге хора чедирип болур – мону сактып алыр болза эки!

59. <…> Өөренири болгаш Бараан Болуру дээрге-ле бир дугаарында Өөредигни өөренип, ажыглаанының болгаш Башкыны хүндүлээниниң ачызында медерел делгемчидери болур. Эде чаартынылгаже эм болур Башкыга хүндүткелди болгаш ынакшылды ыдыктыы-биле кызыгаар чок өстүрээлиңер.

60. Чүректиң чалбарыы дээрге ынакшылдың болгаш бердингениниң илерели-дир. Дуржулганың савазын долдурар бис, чүге дээрге олче чайлаш чок чедип кээр бис. (Дуржулганың савазын «аяк» («чаша») деп турар. Ол чүрек чоогунда чыдып турар. Бүгү чуртталгаларывыста дуржулгавыс, эртем-билиивис, сагыш-сеткиливистиң байлаа ында чыглып, үүжелеттинип чоруур. Ш. Ондар). Үнелиг үевисти кудулап, үрелииринче чарыгдавас бис. Мөзү-бүдүжүвүстүң багай талазынче үрелиишкин бүрүзү башкартынмас бойдус халаптарын болдурар, өскээр чугаалаарга, Октаргайга ол таарышпас. Медерелдиң өзери, ылап-ла, Бистиң байырлалывыс! (Шупту кылып турар багай чүүлдеривис, багай бодалдарывыс багай энергия үндүрер, Октаргайның арыг энергиязынга ол таарышпас, ынчангаш бойдустуң айыыл-халаптары болуп турар. Буруңгу үелерде кончуг бедик цивилизациялыг, сайзыралдыг Лемурия биле Атлантиданың чону өлүржүп-чидиржип, багай херектер кылып, сагыш-сеткили баксыраарга, олар бойдус халавындан далай адаанче кире бергеннер. Ынчангаш, кол чүве материалдыг сайзырал-даа эвес, а кижиниң чаагай мөдү-бүдүжүнүң, сагыш-сеткилиниң сайзыралы болур. Ол бар болза-ла, кижиниң амыдыралы багай болбас. А Октаргай хоойлуларын болгаш канчаар мөзү-бүдүштүг, шын чурттаарын сарыг шажында Будданың өөредиинде бижип каан. Майтреяның бо-даа өөредиинде берип турар-дыр. Шажын өөредиглери дээрге хоозун, меге чүүл эвес, ол кижиниң чуртталгазында, харын-даа, бирги чергениң кол өөредии болур ужурлуг. Ону билбес, Октаргай хоойлуларын билбес кижи дириг амытанга дөмейлежип   болур. Тыва чаагай чаңчылдар, өске-даа чоннарның кижизиг чаңчылдары шажын өөредиглеринден үнген. Ынчангаш кижи бүрүзү Бурганнар өөредиглерин билири чугула. Ш. Ондар). 

Орук айтыкчызы

62. Шупту шажыннарда чок апаргаш, Черден чоруп турар кижиге орук айтыыр төлээ берип каар турган. Ол Ыдыктыг (Святой), азы Ангел, азы чок апарган төрели-даа болуп болур. Шак ынчаар өлүм соонда чуртталга делегейиниң барын болгаш Башкарыкчының чугулазын бадыткап турар. Башкарыкчының чугула херектииниң дугайында бодалга чаңчыгар херек. Ынчаар бүгү шажыннарга Дагдыныышкын болгаш Өөредиишкин тургустунуп турган. Ынчангаш кажан Башкы дугайында чугаалап тургаш, ол чайлаш чок кээр чүүл дугайын сагындырып турар Бис. Өөредиг чурттап-даа туруп болур, чок-даа апарып болур. Чырыкче чүткээш, чуртталганы чииги-биле саглаңнадыр чечектелдирип ап болур.

63. Психиктиг энергияның шынары дээрге-ле шын шиитпирни хүлээп алыры-дыр. Бо шынарны кижилер боттарынга канчап сайзырадып алыр ужурлугул! Бо шынар чокта, делгемниң оттары шиңгээдип алдынмас. Бо шынар чокта, херек ужурлуг эртинелер база хүлээп алдынмас болгай. Чүгле   Дээдиге дээр болза, ол угланыышкынны берип болур, ынчангаш Дээди Эге-Үндезинни билиринче чүткүүрү чугула. Чүгле шак ынчаар Иерархия хоойлузунче чоокшулап болур бис.

66. Кижи төрелгетенниң Дээдиниң Күзел-Соруун күүседирин билбези ону аңгыланчак байдалга эккелген. Ынчангаш аңгыланмас дээш, Бистиң өөреникчилеривис бүгү күүседир күжүн ажыглаар ужурлуг. Ынчангаш Иерархия хоойлузун билири дыка чугула!

71. Билиг чок, мелегей чорукту истеп-сүрүп болур, ынчалза-даа эң-ылаңгыяда бүдүүлүк сүзүктү болгаш ийи арынныг чорукту шаажылаар болза эки. Бүдүүлүк сүзүк эттинмес балыгның карты дег, кошкак угаанны шыва алы бээр. Лабораторияларга болгаш барыын чүктүң аргаларынга удур эвес Бис, ынчалза-даа шынчы чорукту, ажылгыр чорукту болгаш баш удур шын эвес бодавас чоруктуң эрес-дидимин маңаа немеп каарын дилээр бис. Кажан кушкаш мээзи дуржулга бүрүзүнге шаптыктаар болза, кооперация дугайын канчап бодаарыл! Бир эвес четкер мыйызы дуржулга савазынга шаптыктавас-ла болза, эң кайгамчык чүүлдерни берип болур — Ыдыктыгларга бодаарга, четкерлерге хөй бүзүреп турарлар болгай!!

72. Күштүг чүткүл бүрүзү сүлдениң оду-биле долдунар. Сүлдениң чогаадыкчы, тургузукчу ажылы Октаргайның чогаадыкчы, тургузукчу ажылынга киржип турар. Кажан кижи төрелгетен Октаргай Күзел-Соруунуң чогаадыкчы күүседикчизи болганда, Октаргайның бүгү тургузукчу ажылындан канчап аңгыланыыр боор! Ынчангаш Дээди Күштер-биле аяннажылга, дөмейлежилгени бодунга сайзырадыыр херек, чүге дээрге олче чүткүл чокта, чогаадыкчы, тургузукчу ажыл чок. Ынчаар кижи төрелгетен Дээди Күштерни билир ужурлуг болгаш Дээди Күзел-Сорукка каттыжар ужурлуг.

73. Чүгле Иерархияга каттышканындан чедиишкин чедип ап болур, чүгле дээди хоойлуну билири кижи төрелгетенниң караан ажыдар. Тургузуушкуннуң күчү-күжүнче канчап кирбес боор? Ынчангаш өөреникчилерге Иерархияны тургузарының медерелинче кирери чугула. Чүгле кажан Бистиң Оттуг Кижилеривис Бистиң Күзел-Соруувусту эккээрге, база өөреникчилер чоруткан чүүлдү хүлээп алырга, ынчан тудуп, тургузуп болур. Иерархия хоойлузун тудугжу бүрүзү билир.

75. Кижиниң бодунуң кылган дуржулга, шенелдези кезээде ажыктыг болуру чугаажок, чүге дээрге шенелде дугайын сагындырып кээр. Шенелде дээрге чогаадыкчы чоруктуң демдээ. Кижилер үзүктел чок чогаадып, тургузуп турар деп бодалга чаңчыгар херек. Көрүш бүрүзү-биле, тыныш бүрүзү-биле, шимчээшкин бүрүзү-биле олар октаргай чалгыгларының агымын өскертип турарлар. Бир эвес хос чер чок болганда, делегейлер канчаар тудушканыл! Чуртталганың клеткалары ыяштың бүрүлери дег өзүп турар. Ынчалза-даа, бис, бистиң шимчээшкиннеривистиң хевир бүрүзүн артырып турарывысты уттуп алыр бис. Дээди Шуткукчуга төлептиг болур кылдыр, ол кайы хире онза чараш болур ужурлугул!

Чаа үе-чада

77. Чаа чада бүрүзү чаа байдалдарны негээр. Чаа чада бүрүзү бодунуң тургускан күжүн эккээр. Ынчангаш берге үеде бергелерге таарыштыр, күчү-күштүг тепкииш чада тургустунар. Ынчангаш кажан бодалдар келир үениң күчү-күжүнге быжыга бээрге, Бистиң өөреникчилеривистиң тургузукчу ажыл-чорудулгазы чедиишкинни эккээр. Чурттар сандарап турда, кайгамчык чаданы Бис ынчаар тургузуп турар Бис! Бистиң Күчү-Күжүвүс чуртталгаже ынчаар кирип турар! Тепкииш чаданың көстүп кээри дыка чоок, ынчалза-даа делегей бодунуң салым-чолун шиитпирлеп турар. (Мында социализмни бижип турар. Ш. Ондар).

78. Делегейде чүү-даа чүве уттундуруп, чыдып калбаан. Бис, чамдыкта, улуг хемчээлдер-биле хемчээр бис, ынчалза-даа дуржулганы бичии хемчэлдер-биле база чорудар болза эки, оон ыңай угаап бодаарын база хайгаараары чугула. Улуг-даа, бичии-даа бодалдар өөредиглиг. Кайгамчык улуг моондакты эртип алган кижи бичии шалбаа сугга тая берип болур. Бак чаңнатканын утпазы, хомудаары, бодун бодаары өскерликчи болгаш кортук чорук ышкаш, кижиниң артык эки талаларын чок кылып каар. Чаа шенелде даш кайдал? – деп, – байдалдарны өөренип билип алыр болза эки. Ынчаар чүве эндевезивис-биле шенелде, шылгалда бүрүзүнге өөрүүр медерелге чедип кээр бис. Бис мынчаар чугаалаар бис: «Баштыңчы Улуг Бурганывыс, Бодуңнуң Күзел-Сорууң чоргус, чок болза бер, чок болза ап ал. Сээң-биле кады мээң капка-дузактарымны ылгап, хынап көөр бис. Сээң-биле кады мээң дүүнгү шиитпирлеримни хынап көөр бис. Бөгүн тодуг мен, эртенги чемниң хемчээлин менден артык билир Сен. Сээң Күзел-Сорууңдан эртпес мен, чүге дээрге чүгле Сээң Холуңдан ап болур мен». Бодувусту ынчаар улуг чүүлге болгаш биче чүүлге хынаар бис.

79. Үениң дүшкүүрлүүн шагда билир силер, коргуп турар кижилерге чугаалаңар: кажан Баштыңчы Бурган чүрээңерге чурттап чорда, бажыңардан чаңгыс-даа баш дүгү барып дүшпес болгаш кижи бүрүзүнге сүлдениң болгаш мага-боттуң өргээзин бээр. Чүрээңерни арыг кылдыр камнап чоруңар, Мен ынаар кире бергеш, силерни куяк-биле камгалай куржаптып болур кылдыр. Бир эвес алган чүүлүңерни сеткилиңерге Баштыңчы Бурганга берген болзуңарза, Ол ону силерге чүс катап улгаттыргаш, эгидип бээр деп сактып алыңар. Бодалыңарны Баштыңчы Бурганга бодап, салып кааш, Баштыңчы   Бурганны чүрээңерге киирип алыңар. Оон башка Баштыңчы Бурган чокта, куруг, хос чүрекке ышкам болур болгаш үрүп каан хой сыңыйының иштинде горох дег, куруг, хос чүрекке каржы чорук дагжай бээр. Дайзын чүрээңерже кирбес кылдыр, чүрээңерге Баштыңчы Бурганны киирип алыңар. Силерге тайбыңны күзедим!

81. «Бир эвес Баштыңчы Бурганның Овур-Хевири үргүлчү бистен чарылбас болганда, Дээдиге канчап чалбарыыр бис»- деп айтырарлар. «Харын Ону дамчыштыр Өндүр Дээдиге чалбарыңар»-деп чугаалаңар. Оон ыңай, бир эвес силер Баштыңчы Улуг Бурганның Овур-хевиринден үргүлчү чарылбас байдалга келген болзуңарза, бо айтырыг силерни дүвүретпес ужурлуг. Кажан бис нарын энергиялар-биле медерелдиг харылзаага келген болзувусса, дүүн биске билдинмес турган чүүлдер бөгүн көңгүс билдингир апаар. Дүүн муңгарап турган черивиске оожургалга болгаш аас-кежикке ынчаар өөренип алыр бис. Хүн-бүрүнүң ажыл-херектеринге бистиң медереливистиң кайы хире арыгланып турарын хайгааараары ажыктыг. Чүгле Баштыңчы Бурганның овур-хевири бүгү төптерни ажылдадып болур болгаш база камгалал болуп болур.

82. Угаан-Сарыылдың Оолдары, Бис оларны Чер кырында Иерархтар дээр Бис; Угаан-Сарыылдың Уруглары, Бис оларны Чер кырынга ынчаар адаар Бис. Сүлдениң сайзырал-хөгжүлдезинче чүткээн кижилер бурунгаарлаар дээш, Иерархияның базымнарын эдерер ужурлуг. Бурунгаар чүткээн өөреникчилерни кым өөредирил? Өөрү үнериниң оруун кым айтып бээрил? Чүгле Угаан-Сарыылдың Оолдары болгаш Уруглары. Чедиишкинниң оттары кымда барыл? Оларда. <…> Чүгле Иерархия хоойлузун чуртталгага медерелдии-биле хүлээп алыры шын орукту тургузар. <…>

Иерархия хоойлузу

83. Дээди Угаан-Сарыыл Чер кырынга Иерархияның күжү-биле ынчаар чаяап, тургузуп турар. <…> Иерархияны билири бүгү аргаларны ажыдып бээр. Иерархия хоойлузун Октаргайның чаякчы, тургузукчу ажылының Шыпшык Бедии деп көөрү шын боор, оон Чырык кээп турар, олче бодалдар угланган; ынчаар Иерархияның Шыпшык Бедиинче эң-эки чүткүлдерни углаар херек. Кажан чүгле дээди чүүлдер медерелдии-биле чуртталгаже кирип турда, дээди чүүлдү берип болур. Оттуг болуушкун чоокшулап кел чыдар!           

84. Өөредилгени канчап билип алырыл? Иерархияның дээди хоойлузунче канчап чоокшулап алырыл? Чүгле бодалдың чидии-биле болгаш медерелдиң делгемчээни-биле. Үстүкүден Айтыышкынны дүгжүлге, тааржылга чокта канчап хүлээп алыр боор? Энергия бүрүзүн билип, хүлээп алыры болгаш Өөредилгениң делгемин хүлээп ап билири херек болгай. Чүгле дүгжүп, тааржып турда, саваны долдуруп болур болгай. Ынчангаш делгем чүүл делгем медерелге төлептиг. Бисче баар орук чүгле Иерархия-биле чедип алдынар.

85. Шажыннарда кижиге энергия бээр болгаш Үстүнче чүткүдер мергежилгелер бар. Бисте ындыг шыланчыг мергежилгелер чокка, чүректи долдуруп тургаш, ону чедип ап болур. Бо орук-биле чедиишкин чедип алган кижи өскелерден артык болур, чүге дээрге чүректиң ол эге дөзү эстип, төнмес. Чүрекче киирип алган Баштыңчы Бурганның овур-хевири балалбас болгаш кайы-даа үеде дуза кадарынга белен. Чүректиң бо оруу эң-не буруңгу болгаш медерелди элээн делгемчидери хереглеттинер. Бир дугаар чугаалажылга үезинде чүрек дугайында чугаалап болбас, оон башка сорулга чокка ону аартадып болур. Оон ыңай, бир эвес, Баштыңчы Бурганның Овур-Хевирин чүрекче киирип албаан болза, ынакшыл дугайында чугаалаары база ажык чок. Ынчалза-даа чүректиң күчү-күжүнүң дугайын айтыр ужурлуг үе чедип келир. Чүректен айтырып, сүмележип чоруурун дилеп тур мен, чүгле Баштыңчы Бурганның Овур-Хевириниң чоокшулап келгенинден эвес, а Октаргай чылдагааннарындан. Баштыңчы Бурган-биле харылзаа быжыг болза, ханы тамы ажары белен болур.

Баштыңчы Бурганның овуру

86. Баштыңчы Бурган чокта берге. Бурганның адын чүгле сөс-биле каттаптавайн, ону чүрээңер иштинге долгандырыңар, чаъс суундан хая тиинче кире берген даш дег, Ол оон үнмес. <…> Баштыңчы Бурган-биле камгаланыыр херек!

88. Бүгү Октаргайны башкарып турар чаңгыс хоойлу – Дээди Күзел-Сорук бар деп билиишкинниң болгаш бадыткалдың күчүзүн өөреникчи медереп билир ужурлуг, бо уг-биле сүлдениң сайзыралы болуп турар. <…> Дээди Күзел-Сорукту боттандырарынче чүткүл минниишкинниң дыыжызынга чедирер. <…>

89. Кажан силерниң медерелиңер Баштыңчы Бурганның Овур-Хевир Чуруун үргүлчү ап чоруурун мининдириптерге, шөлээн черге олуруп алгаш, Ооң Чуруун кайгап көрүңер. Ынчалза-даа ыяк шиитпирлеп алыр херек. Бир эвес Баштыңчы Бурганның овур-хевирин үргүлчү ап чорда, өскерликчи чорук болур болза, үргүлчүлелдиг чемелээшкин болуп болур. Чурукче кичээнгейлиг топтап көргениңер соонда, карааңар шимгеш, Ону үшкү карааңарга (хавак ортузунда. Ш. Ондар) эккелиңер. Ынчаар мергежилге кылгаш, Бурганның Чуруун диргизип алырыңарга, чүрээңер хөлзей берип болур. Удавас Баштыңчы Бурганның Овур-Хевири силерден чарылбас болур. <…> Шак ынчаар чуртталгага кончуг ажыктыг чүүлдү чедип ап болур, ынчалза-даа медерел аңаа дүгжүп турар болза эки.

90. <…> Бир эвес Башкының Овурун медерелиңерге дыка тода көрүп шыдаар болзуңарза, бодуңарның медерелиңерни Ооң медерелинче киирипкеш, Ооң күжү-биле кылыр чүүүлдериңерни кылып болур силер. Чүгле Башкының Овуру бичии-даа хажыдыышкын чок, дыка тода болур ужурлуг. Бир эвес ону чедип аптар болзуңарза, ол чедиишкин дамчыштыр бодуңарга, чоок кижилериңерге, ажыл-херээңерге дыка ажыктыг болур. <…>

91. Бир эвес Башкының Овурун тода көөрү Ооң-биле чоок кады-ажылдажылганы тургузар болза, кандыг бир чүүлдүң тода хевирин үшкү каракка көөр болзувусса, ол биске чоок болгаш билдингир апаар. Буруңгу илби-шидиниң бир негелдези чүүлдерни бодалынга тода көрүп өөредири болур. Ынчаар тода көрген чүүлдү канчаар-даа ажыглап, чагырып, кандыг-даа ырак черге ону башкарып, ооң аргаларын чоокшуладып болур. Анаа бөдүүн чүүлдерден эгелээш ырак планеталарга чедир. <…>

94. Бир аян-чорукчу корабльга олуруп турда, ооң алдынныг хавын оорлап апарган. Улус хорадап турган, а когараан кижи хүлүмзүрүп: «Кым билир ону?»-деп каан. Шуурган кээр орта, корабль далайже дүже берген. Чүгле чаңгыс ол аян-чорукчу эрикче үндүр чалгыдыпкан. Ортулук чурттакчылары ооң дириг артканын кайгап турда, ол база хүлүмзүрээш, чугаалаан: «Мен, анаа, орук өртээн өскелерден аар төлеп калдым». (Кижиниң амы-тыны каража-биле солуттунуп, камгалаттына берип болур. Шупту болуушкуннар уткалыг болур. Ынчангаш каражага таварышкаш, улуг хомудавас болза эки. Ш. Ондар). Кажан эки үрезиннерниң өзүп кээрин болгаш хоранныг бодалдарның дүжүдүнүң кайы хире үр быжарын билбес бис. Оларның быжарынга үе херек болгай. Ынчангаш хоранныг багай бодалдардан коргуңар, оларның чаңгызы-даа ис чок чиде бербес. Каш шакта, каяа, кайы чуртка хоран быжа бээрил? Ол бичии-даа болза хоралыг, боостааны дырбап ашпас хлеб быжындызы чок.

Багай бодалдарның айыылы

95. Бодунуң тарып алган чүүлүнүң дүжүдүн албайн барып болур бе? Үрезин хора чок, буянныг, эки болзун, оон башка хорандан чүгле хоран үнер. Хөй-ле чүүлдерден чайлай берип болур, ынчалза-даа бодалдар шыгжамыры эң-не быжыг. Бодал бедик энергия болганда, эстип-чиде бербес болгаш чыглы берип болур. (Кижиниң багай бодалдары чыглы бээр болза, багайны халдадыыр. Эки бодалдар чыглы бээр болза, экини эккээр. Бодалдар бодунга дөмей чүүлдер тыртар. Ш. Ондар). Үнүштер-биле дуржулгалар кылгаш, бодалдың күжүн көргүзүп болур. <…>

98. Чүткүлдүг болгаш оттуг сүлдениң сырылары кайы хире чараш ийик! Оттуг Бараан Болуушкун кижи төрелгетенге чаа хөгжүлдениң дыка хөй демдектерин эккээр. Ынчангаш Агни Йога ынчаар амыдыралчы болуп кирген… Чүгле кижи төрелгетенче чорудуп турар шупту чүүлдерни хүлээп алыр херек. <…> Шынап-ла, оттар кедереп турар! Дыка хөйү тургустунган, дыка хөйү буруңгаар угланган, дыка хөйү ам-даа мурнувуста!

99. Кижилерниң кол частырыы — боттарын бүгү чүүлдерден дашкаар бис деп бодаары. Кады ажылдажылга чогу оон үнер. Дашкаар турар кижиге болуп турар чүүлдерге ооң харыысаалгалыының дугайында тайылбырлаары болдунмас. Бодунуң ажыын, бодун бодаарының адазы, Чырыктың шыгжамырындан удазынны одура кезер дээш, бодун туурайлаарын болгаш чигзинигни тарып алган. Чырык бодалдан үнер, ол ооң уржуу деп чүвени кым-даа бодаар хөңнү чок. А планеталар аразының делгеминде чурттап турар хөй амытаннар бодал-биле кады ажылдажылганың күчүзүн күзелдии-биле бадыткаарлар. Олар кады ажылдажылганы болгаш харыысалганы билирлер. Бодун делегей бодалынче киирип болур болгаш ооң-биле дээрге-даа, Черге-даа чалгынныг болуп болур. Ырак делегейлер-биле харылзаа дугайында хөй үнелиг сагындырыглар тараттынган!

 104. Сагыш-сеткил сайзыралынга медерел-биле чүректиң каттыжыышкыны херек. <…>

105. Чүректен үнген сөстер делгемни долдуруп турар, ынчангаш бодалдарның күштүг агымы планетаның хоралыг газтарындан камгалаар хүрээлеңни тургузуп турар. Бодалдар кижи төрелгетенни камгалаар камгалал четки болуп турар. Чүгле бо чырык херелдер караңгы-биле тулчуур күштү берип турар болгай. Ынчангаш делгемге чүректен үнген сөстер каъды тургузары хөлчок чугула, оларда чырык бар. Ынчаар кижи төрелгетен бодалдарның чалгыннары-биле өөрү үнүп турар. Хөгжүлде ынчаар тургустунар.

106. Чүректиң эртинези деп чүл? Чүгле чаагай сеткил эвес, чүгле энерел сеткил эвес, чүгле Иерархияга бердингени эвес, а Октаргай Медерели-биле чаңгыс аай аяннашкаа, кажан чүрек бодунуң ритминден аңгыда, Октаргай ритмин база шиңгээдип, ажыглаары. Ындыг чүрекке бүзүреп болур, ол өттүр минниир болгаш Дээди Делегей-биле харылзаа дег, маргыш чок шынын чугаалаар. <…>

109. Болуушкуннар чүге хенертен болу бээрил? Ийи байдал бар: бирээде – манаашкын кезээде удур туруушкунну тургузар; медерелдиг манаашкын безин болуушкунга артык энергияны берип болур. Ийиде – чугаалаптарга, кара чүүлдер дыңнап кааптып болур. Чанынга өске кижи турар болза, ол дамчыдып болур. Бүгү делегей ак болгаш кара деп ылгалып турар. Чамдык кижилер оларга медерелдии-биле бараан болуп чоруур, өскелери – бодунуң бойдустан бүдүжү-биле, үш дугааргылары – каяа-даа дуза чок, ылчыргай мөөң бөлүк болуп турар. Кара тала күштүг, чүге дээрге Чырык-биле демиселге оларга күчүлүг күш херек. Кажан оларның ынак Кали Юга үези төнүп турда, оларның күжүн үнелевейн барып болбас. Бо дээрге шиитпирлиг тулчуушкун-тур, ынчангаш кошкак кижилерниң кара таланың элзедиишкининге алзы бербезин кичээнгейге алыр херек. Кара таланың дунчузунуң кайда турарын шагда-ла чугаалаан Бис. (Чер кырын алыр болза, ол Америкада (Нью-Йоркта) туруп турар. Прибалтикада база. Ш. Ондар).

110. Кара күштер айыылдыг апарган, олар Бисти өттүнүп, ёзулалдарын каггаш, бодалдың күжүн ажыглаар апарган. Бистиң-биле оларның демисежиири берге, ындыг-даа болза өөреникчиниң бодалы Бистен аңгыланы бээр болза, хора чедирип болур. Кажан Баштыңчы Бурганны долгандыр каттыжыңар деп чугаалап тура, хөлчок чугула чүвени Сүмелеп турган Мен. Черле Мээң Айтыышкыннарымны соңгаарладып болбас сүмелер деп көөр болза эки болгаш Өөредигни удудар чүүл кылдыр эвес, а бүгү чуртталгага ажыглаар кылдыр берип турарымны билип алыр үе келген.

111. Кажан бүгү Октаргай күштери дүшкүүреп турда, үрегдээшкин чокка аткаарлаары болдунмас. Кажан Чырыкты долгандыр чырык күштер, караңгыны долгандыр кара күштер катчып турда, аткаарлаашкын чок. Ынчангаш кажан ажылчыннар тиилээрин күзээр болза, күчүлүг күш кылдыр каттыжар херек, ылап, ылап, ылап! Бөдүүн бүдүмелдиг чүүл чүгле ооң бичии кезектериниң тудушканындан бар болуп турар, Иерархтан үнүп турар күш ол хире күчүлүг! Ынчангаш тиилээрин күзээр кижилер оларны камгалап турар камгалал – Иерархияга катчыыр херек. Чүгле ынчаар тиилеп болур. Чүгле шак ынчаар эде тургустунуушкун болуп турар дүшкүрлүг үскүлежиишкин үезин чурттап эрттип болур. Ынчаар сактып аалыңар! (Социализм тургузуушкунун бижип турар. Кижилер Бурганнарны бодап, оларга катчыыр хамаанчок, оларны шуут чок деп турган болгай, ол үеде. Ш. Ондар).

Баштыңчы Бургандан кээр камгалал

112. Кажан Баштыңчы Бурганны болгаш Башкыңарны шилип алганыңарда, аткаарлаашкын турбас ужурлуг, орук чүгле буруңгаар, эрте-даа бол, орай-даа бол, чиик-даа болза, берге-даа болза, Башкыга чедип кээр силер. Кажан кара чүүлдер силерни дээрбектей бүзээлеп алганда, чүгле үстүнче, Баштыңчы Бурганче орук артар. Ынчан Баштыңчы Бурганның ырак эвезин, мөңгүн үдазынның бажыңар кырында турарын, олче чүгле хол сунары артканын билип каар силер! Башкыга кара чүүлдерниң дузазы чокка-даа   ужуражып болур, ындыг-даа болза чүгле бүзээлеткен кижи мөңгүн удазынче холун сунар болгаш чүгле айыыл-халап үезинде чүректиң дылынга өөренип алыр. Баштыңчы Бурганны болгаш бодунуң Башкызын чүрээнге үргүлчү миннип чоруур херек!

113. «Ынак болгаш хөлчок хүндүлээр бис»-дээрлер, а боттары Ону эрип калган хар ышкаш сактыырлар. Оларның бурганы уйгу. Баштыңчы Бурган оларның чуртталгазы болгаш чеми апаар үе келир. Ооң Овуру караңгыда кызаңнаашкын дег чырык. Үстүнден келген сөстү эртине дег кадагалаар апаарлар, чүге дээрге оон өске арга чок апаар. Чырыкты билип алгаш, кым караңгы-биле бужарттаарын күзээр боор. Долгандыр караңгы эңдерик, Баштыңчы Бурганче орук чаңгыс. Баштыңчы Бурганны сактып чоруңар!

115. Тамы кыдыы-биле чоруп олурар бис деп чүвени кижилер кезээде сактып чоруурлар болза! Ол ылап-ла ындыг. Чедимчелиг азы чедимче чок-даа байдалдар оларны кайы-даа үеде ынаар киир идиптип болур. Ооң барын үргүлчү, шак санында сактып, олче коргуш чок көөр кылдыр Октаргай агымы-биле харылзааны чүге тудуп болбазыл.

117. Чер шимчээшкиннери, вулкан частыышкыннары, шуурганнар, туманнар, хемнерниң сыыгаары, климаттың өскерлиири, ядыы-түреңги чорук, дайыннар, тура-халыышкыннар, чүге-даа бүзүревези, өскерлип-саттынары – дүшкүүрлүг үениң оон өске кандыг демдектерин кижи төрелгетен манап турарыл? Кандыг-даа өттүр чугаалаар кижилерниң (пророктарның) херээ чок, бөдүүн бижикчи: «Черниң сандараарының коргунчуг демдектери ынча хөй кажан-даа чыылбайн чораан»-деп чугаалап каар. А кижилерниң кулактары бөөшкүннүг, карактары дуглаглыг! Бо планета чылы дег сандаргай үе турбаан! Ылап-ла, Делегей, агаар дег болгаш делгемниң чалбыраажы дег, Чырык ышкаш эргежок чугула, билдирбес Сорунзаларда туттунуп турар.

118. Кали Юга үезиниң төнгенин ынчаар көрүп болур. А Сати Юга үезиниң эгезиниң кайдазы кижи төрелгетенден хамааржыр. (Кали Юга – Караңгы Үе, Сати Юга – Чырык Үе. Ш. Ондар). Сати Юганың албан кээрин Бис билир Бис, ооң каяа кээри, байдалы аңгы-аңгы болуп болур. Мээң дайынчыларым, силерни ажыктыыңар болгаш бердингениңер барымдаалап, чыып болур Мен!

Кижи кудукче дүже берген болгаш ооң үдүн кара пөс-биле дуглапкан!

119. Бодал чуртталганың чаягаар чүткүлүн башкарып турар. Бодалдың арыглаашкынынче болгаш ооң сайзыралынче канчап эвээш чүткүл үндүрер боор! Медерел чуртталганың бүгү илерээшкиннерин тыртып турар болгаш бодалдың тургузукчузу делгемни долдуруп турар. Ынчангаш делгем бодалдарже болгаш чуртталганың үндезиннерин билиринче чүткүүрү ындыг эргежок чугула. Чуртталга бүрүзү бодунуң оруунга тургустунар болгаш ооң шупту ажыл-херектери, кылдыныглары Дээдиге тааржып, дүгжүп турар үндезинниг болур. Ынчангаш бодал бүрүзү маадырлыг чорукче угланган болгаш дээди чүткүлдү камгалаар ужурлуг. Чүткүлдүң шынары ооң хайныгыышкынындан хамааржыр. Ынчангаш медерелди делгемчидер бүгү бодалдарны сайзырадыыр херек, шак ынчаар дээди чаданы тургузуп болур.

Социализмниң тиилелгези

120. <…> Тиилелгени баш удур көрүп каан, шупту үндезиннерни камгалаар херек, дээди чүткүл бүгү аргаларны берип болур. Дүшкүүрлүг, ындыг-даа болза кайгамчык үе. Тургузуушкунну доозарының база үези. Дээди күжениишкинниң болгаш чер тулчуушкунунуң үези. Дээди арынны ажыдып турар болгаш өндүр дээди келир үени тургузуп турар үе! Ынчангаш Дээди Хоойлунуң чуртталгаже кирип турарын көргеш, дайзыннар угаанын ышкынып турарлар. (Мында Башкы социализмниң тургустунуп турарынга өөрүп турар. Ш. Ондар).

121. Бистиң Камгалалывыс чаңгыс, ынчангаш долу медерелди үнелээр Бис. Медерел ийи-чаңгыс чырыш дээш, чамдыкта өже бээр, ынчангаш долу бердинген кижилерни ылгап билир болза эки. Медерелди чүгле ынчаар чедип алыр болгаш делгемчидер. Өндүр дээди орук-биле чоруур херек.

122. Кол-ла чүве карликтер апарбазы. Карликке эргин артаары безин даг үнеринден берге. Карликтиң бодалы үүрмекке болгаш оон буураашкынга эккээр. Кол аураның дээрин хайгаараар деп шын эскертинген; хүлээп алганнар кады ажылдап болур, а хүлээп көрбези оларның ажык чогунуң демдээ болур. Үндезиннер дугайында оларга тайылбырлаан херээ чок, чүрээнде чок болза, чүү-даа оларны билиндирип шыдавас. Үңгүр иштиниң карликтериниң мээзи-биле Башкыны хүлээп ап болбас.  

125. Өөредигни кижилерниң канчаар номчуп турарын эскериңер. Кандыг черлерни эскербээн бооп, оюп эрте бээрин хайгаараңар. Эң ылаңгыяда кижилер өскерлип-саттыныышкынга болгаш психиктиг өлүрүүшкүнге хамаарышкан черлерни номчувас болур. Олар ырак хемчээлге безин бодалдары-биле хора чедирип болур деп чүвени бодаарын күзевестер. Өскелерден буруузу хөй чүүлдеринден кижилер ынчаар дезип турар. Хора чедирерде улуг угаанның херээ чок. Империлдиң кристаллы-биле хораннанган ортумак бодал безин хөлчок дээштиг болур. (Империл дээрге  кижи ажынып, хорадаарга, организмге тыптыыр хоран. Ш. Ондар). Өскерлиирин, саттынарын бодаары – ооң чарттыын кылганынга дең, чүге дээрге хоранналган карт азарганчыг чүвени безин хүлээп алыр. Ылап-ла, бодал-биле хораннаары наркотиктерден артык хоралыг. Бодал-биле чоруткан халдавырлыг аарыглар дугайын сагындырып болур. Халдавырлыг аарыг бүрүзү чииги-биле чоокшулап кээр кылдыр кижи ол хире кошкай берип болур. Бодал ажыдар дүлгүүр-биле дөмей.

126. Кижилерниң хоранныг бодалдарындан канчап камгаланыырыл? Чаңгыс ол-ла сүме – Баштыңчы Бурганче чүткүлдү күштелдирер, бо угланыышкын-биле камгалал күштү ап болур. Ынчангаш сагыш-сеткилдиң дээди чүткүлүнден бичезинге чедир, харын-даа, мага-боттуң хереглелдеринге чедир, Иерархияны медереп билирин сүмелеп тур Мен, каяа-даа мөңгүн удазын херек. (Мөңгүн удазын дээрге тудуш харылзаа. Ш. Ондар). Чөрүү чорук болгаш кара күштер кижилерже Иерархия дугайында бодалды киирбезин кызар.

127. Дээди Башкарыкчыны хүлээп көрбейн, канчап тудуп, тургузарыл? Иерарх-биле тудуштуруп турар удазынны билбейн, канчап чогаадып, бүдүрерил? Кажан кижи Чырыкка уткуштур ажыттынмаанда, канчап дуза манаарыл? Чүгле Иерархияга катчып, чоокшулааш, ооң Күзел-Соруун күүсеткеш, ылап-ла, бүгү тургустунган чүүлдерге четтигип, чедиишкинниг болуп болур.

Башкыга бердинери

128. Өөреникчиниң Башкы-биле эп-харылзаа тудар дээн чүткүлү дээди хоойлуларны билип алырынга чедирер. Башкыны күзевес өөреникчи бодунуң чүве билбезин көргүзүп турар, чүге дээрге бодунуң сайзыралын доктаадып турар. Кижини өөрү чүткүдер күш бүрүзү – сайзыралдың күжү-дүр. Иерархтың сунган Холун тудуп, хүлээвейн, канчап медереливисти сайзырадып, сүлдевисти көдүрер бис? Бот тогдунары дыка хоралыы-биле буруңгаарлаарын токтаадып турар, ынчангаш чүгле Башкыга бердингениниң күжү-биле медерел сайзыралын чедип ап болур деп чүвени төлептии-биле айтыр херек. <…> Чүгле ынчаар кижи көдүрлүүр, чүгле ынчаар кижиниң хөгжүлдези тургустунар. Ынчангаш Бараан-Болурунуң чаражы – медерелдерниң каттышканында. Кажан медерелдер каттышканда, Чырык тергиидеп турар болгаш дээди доктаал боттанып, тургустунар. Чүгле ынчаар дээди хоойлу чедип алдынар! Бис ынчаар тургузуп турар Бис!

129. Өөреникчиге салыр айтырыгларны билип алыңар: «караңгыга бараан болуп турар сен бе? Дадагалзалдың чалчазы эвес сен бе? Өскерликчи эвес сен бе? Мегечи эвес сен бе? Багай сөстер чугаалап турар сен бе? Чалгаа эвес сен бе? Хорадаачал эвес сен бе? Турум эвес сен бе? Бердинерин билир сен бе? Күш-ажылга ынак сен бе? Чырыктан кортпас сен бе? – шылгалдага белеткеп тургаш, өөреникчилерни ынчаар айтырыңар.

132. <…> Чүректен үнген чалбарыг Дээди Делегей-биле харылзаштырар. <…> Бодалдардан аараан аарыгларның санынче кичээнгейни салыр үе келген. Аарып тургаш, бодалдарга удур сургаал кылыр болза эки. Оон ыңай аарып турар черге дегбейн, кырындан хол-биле суйбаашкыннар кылып болур. Өске тускай чүнүң-даа херээ чок, чүгле Дээди-биле сорунзалыг харылзаа тургузар чүректен чалбарыг херек. Аарыг черни хол-биле сыйбап тургаш, аарыг дугайын бодавайн, Дээди-биле харылзаа тудар болза эки.

139. Башкы-биле өөреникчини харылзаштырып турар удазын эң күчү-күштүг болгаш камгалал бээр. Башкы чокта, канчап чүткүл кылырыл? «Боттарывыс чоруур бис»-дээр сорук-чоктар камгалал четкиниң утказын билбес, ынчангаш Иерархияны хүлээп көрбези тудуг-тургузуушкуннуң принцивин үрээни-биле дөмей уржук бээр. Чүгле ынчаар күчүлүг Иерархия-биле тудуг-тургузуушкун кылып болур. (Совет удуртукчулар социализм тургузарда, Шамбаланың Бурган-Башкыларының сүмелээн дузазын хүлээп ап, Оларның удуртулгазы-биле социализм тургускан болза, көңгүс өске социализм турар ийик, ол дүшпес-даа турган. Башкы өттүр сөглеп каан. Ш. Ондар).

141. «Баштыңчы Бурганга бүгү-ле күжүм-биле дилег кылырымга, четпес-тир»-деп айтырып болурлар. «Арыг, ак сеткилиңер-биле кылдыңар бе?»-деп чугаалаңар. Дилегниң бо шынары чырык дег чугула. Кижи бүрүзү чүрээнче топтап көрүпкеш, ында эрги делегейниң артынчыларын көрүп каар. Арыг сеткил чокта, харылзаа удазыны тургустунмас. <…>

145. Амгы үе Атлантиданың сөөлгү үези-биле көңгүс-ле дөмей апарганы хомуданчыг. База шак-ла ындыг меге-пророктар, база ол ышкаш меге-камгалакчылар, ол-ла дайыннар, ол-ла ышкаш өскерлип-саттыныышкыннар болгаш сагыш-сеткил ядаралы. Бисте цивилизацияның азарганчыг чедиишкиннеринге чоргаарланып турар, шак-ла ынчаар атлантылар бот-боттарын дүргени-биле мегелээр дээш, планета кыры-биле хөлчок дүрген кылыйтып билир турганнар. Шак-ла ынчаар хүрээ-хииттерни бужартадып турганнар болгаш эртем алгыш-кырыш, чиижең чорук кылыр чер апарган. Ол-ла чүүлдер база тудуг талазынга болуп турган, быжыг кылдыр тударын кыспайн турганнар! База-ла Иерархияга удур турганнар болгаш чүгле боттарының ажыын бодаар чорукка боой туттуруп турганнар. База-ла чер адааның күштериниң турум деңзигүүрүн үреп, демнии-биле айыыл-халаптарны тургузуп турганнар.

Баштыңчы Бурган-биле харылзаа

146. Кажан Баштыңчы Бурган-биле харылзаа быжыг турда, дагларны-даа шимчедип болур. Иерархияже чүткүл хөй-ле чугаалажып турар культуравысты тургузар. Чер кырының хоозун чүүлү-биле быжыг шивээ тудуп алыр бис деп бодап турар кижилер өлүг кижилер-дир! Хирлиг малгаш-биле шивээ тудуп алыр дээн чаш уруглар ышкаш, угаан-сарыылы чок! Ылап-ла, чүгле сүлде, сеткил-сорук делегейи үрелбес болгаш быжыг! Культураның бирги демдээ – алгыш-кырыш кылбазы деп айтып болур.

147. Кажан планетаның салым-чолу шиитпирлеттинип турда, күштер ак болгаш кара деп аңгыланып турар, ынчангаш сүлде бүрүзү дидим эвес болбас ужурлуг. Чырык талаже баар болза, Бистиң-биле кады, Иерархияның тугунуң адаа-биле чоруур. Кара талаже баар болза, кара тук адаа-биле чоруур. Тулчуушкун үезинде Бистиң Күчүвүстү медереп билип, шын хоойлулуг чуртталганы тургузар херек. Чүгле ынчаар кара күштерниң чөңгээзин хүлээп ап болур, чүге дээрге кажан кижи кортук чоруктан болгаш өскерлиир чоруктан камгалалы (иммунитеди) күштүг болза, ынчан тиилелге чедип алдынар. Ынчангаш, Иерархияга катчыылыңар.

148. <…> Кажан тулчуушкун күштелгенде, хора чедирерин күзээр кижилер эңдерли бээр, ынчалза-даа план үреттинмес болгаш чүгле Иерархиже долу чүткүл тиилелгени бээр. (План дээрге социализм тургузарының планы. Ш. Ондар).

149. Баштыңчы Бурганга шупту чүвени дагзыыр деп кажан-даа чугаалавайн турган, харын-даа Баштыңчы Бурган-биле боттарыңарны долдуруп алыңар-деп чугаалап турган! Дидим эвес, түңнел чок дагзыышкын биле Баштыңчы Бурганның медерели-биле долдунуп алырының ылгалы дыка улуг. Баштыңчы Бурганның медерелинге дөмей медерел, тиилеттирбес селеме дег, бүгү моондактарны узуткаптар! Төнчү Чок Күштүң Үндезинин киирип алырга, могап-туруп деп чүве чок болур! Эртинмес камгалалдыг хүрээже коргуушкун кирбес болур! Өскээртен камгалал дилевейн, медерелдерниң каттыжыышкыны тиилеп турар кылдыр, Мээң Камгалалымны хүлээп алырыңарны сүмеледим.

154. <…> Делегейниң буураары дээрге чүгле Иерархияны үрээниниң түңнели-дир. Иерархияны үрээри — бүгү чылдагааннарны болгаш бүгү хоойлу-дүрүмнүг уржуктарны үрээри-дир.

155. <…> Ылап-ла, Дээди Медерелге коштунган кижи бодалдың күчүзүн алыр. Чүгле кажан сүлде Үстүнден чоруткан шупту чүүлдерни хүлээп ап тургаш, медерелин сайзырадып ап болур, оон башка «аякта» чыдар күштү оттуруп шыдавас. Шак ынчаар харылзааның удазыны сүлдениң өөрү үнер чадазы болур. Чогаадыкчы, тургузукчу ажыл ол кайгамчык удазынның дузазы-биле болдунар. Сүлдениң өөрү үнери шак ынчаар Баштыңчы Бурган-биле харылзаа дамчыштыр болур.

156. Бо харылзаа Бисти каттыштырып турар болгаш эң-эки уржуктарны тургузуп турар. Эң-не кайгамчык удазын дээрге Иерархтың чүрээ-биле өөреникчини тудуштуруп турар мөңгүн удазын. Сагыш-сеткилдиң чырыы бо күчү-күштен кээп турар, кажан Бис чаңгыс аура дугайын чугаалап тургаш, ылап-ла, бо харылзааны ынча деп турар Бис! Ынчангаш Чарлыктарны Чырыктың Үнер Дөзү кылдыр шыгжап алзыннар, шак ынчаар эң-эки аргаларны тыртып ап болур. Кажан өөреникчиниң медерели Иерархтың медерелинче чүткүп турда, Иерарх биле өөреникчиниң каттышкан үнелиг харылзаазы болу бээр. Шак ынчаар каттышкан чүрек-биле кайгамчык арын тургустунар!

158. Башкы-биле харылзаа чокта, бичии хыл дег хүлээп көрбезинден безин бодунче кара чүүлдү киирип ап болур. Сиилең чорук өскерликчи чоруктан ырак эвес чыдып турар. Өөреникчиниң Башкы-биле чарылганының уржуун ынчаар көрүп болур. Кижилерниң угааны четпестер бажыңынче барып, оларның аарыының чылдагаанын болгаш кандыг байдалга аараанын хынап көөр үе келген, эң ылаңгыяда бо аарыг амгы үеде чумадан-даа айыылдыг апарганда. Башкы-биле харылзааны камнап болгаш чүрээңерни Баштыңчыг Бурган-биле долдуруп билир болуңар. <…> Баштыңчы Бурганны кааптары – бодунга өскерилгени-дир.

161. Баштыңчы Бурган-биле чүгле дорт харылзаа эвес, харын-даа Иерархияже медерел чок чүткүл безин Октаргай күштери-биле бичии-даа болза харылзажылганы тургузуп турар. <…>

166. <…> Чер шимчээшкиннерин кижилер база болдуруп турар. <…>

167. <..> Кижи төрелгетен илдеңи-биле шын оруктан болгаш шын чүткүлден өскээр чайлап турар! Кым орук айыткан Холду хүлээп көрбес болдур, ол мөңгези-биле азып артып каар. Кым бодунуң тускайын чидирип алырындан коргар болдур, ол тускай эвес. Ынчангаш Иерархияның дээди хоойлуларының дугайында боданзыннар.

172. База бир частырыг – кижилер чүве билбезинден азы боттарын агартынар дээш, оларның бодалдары биче болгаш каяа-даа чедип шыдавас – деп бодап чоруурлар. Херек кырында, бодалдың күжү улуг болгаш, аңаа делгем-даа, үе-даа моондак болбас. Ынчангаш чурум чок боданыыр кижилер караңгыга кандыг чүүлдерге дээптерин билбейн, холун чайган кижиге дөмей. Оон ыңай, бодалдар делгемге чыглы бээр. Чаңгыс аай ниити бодалдарны, база кайы хамаанчок алгырышкан хөй саасканнарның үннери ышкаш бодалдарны дыңнап болур. Ындыг бодалдар делгемни долуп турар болгаш үстүкү делегейлерни дүвүредип турар. Эргим бодалчылар, саасканнар, силер база бодалдарыңарның шынары дээш харыысалгалыг силер. Силер ынчаар безин боттарыңарның келир үеңерни тургузуп турар силер.

 173. Харыысалгадан чайлай бээр арга чок. Бичии азарганчыг бодалдар безин делгемче үне бергеш, бодунга дөмей бодалдар тыртып, планетаның ыштыг атмосферазын тургузуп турар. Бодал үрелип-чыдыырының микробун узуткап, арыглап болур, ындыг-даа болза чагыртынмас бойдус халаптарын база тургузуп болур. Кара күштер боттарының кара херектеринге сайзыралы кошкак кижилерни ажыглап турары таварылга эвес. Силер үргүлчү «культ-ура» деп сөстү чугаалап турар силер, ол Чырыкты хүндүлээни-дир. Бир эвес бодал бүрүзү делгемни бокталдырып, караңгыладыыр азы арыглаар болганда, Чырыктың мурнунга харыысалга дыка улуг деп чүвени сагындырып тур Мен. Ынчаар сактып аалыңар.

174. Бараан Болурунуң оруу дээди билигге эккеп болур болгай. Чүгле билиг чок, мелегей чорук планетаны амгы байдалга эккеп болур. Кижи төрелгетен чүткүлдүң чаражын медереп билирин чидирип алган болгаш тудуг-тургузуушкун мелегей аңгыланыышкын-биле болуп турар. Бараан Болурунуң чаңгыс-эви, деми кижи төрелгетенге ынчаар камгалал болуп турар. Тургузуушкуннуң бүгү күжү Иерархияда туттунуп турар болгай. Күчүлүг удазын ынчаар бүгү Октаргайны каттыштырып турар. Ылап-ла, чүгле Өндүр Улуг Бараан Болурунуң долу медерели-биле Сүлдениң чаражын болгаш Иерархияның күчү-күжүн билип болур. Делгем өндүр улуг хоойлуну күүседиринче кыйгырып турар, ылап, ылап, ылап! Шак ынчаар ёзулуг хөгжүлдениң чадалары тургустунар.

175. Ынчангаш чүгле Өндүр Улуг Бараан Болурун долузу-биле билири өөреникчилерге Иерархияже чүткүлдү берип болур. Кажан кижиниң чогаадыкчы, тургузукчу ажылынче Өндүр Улуг Бараан Болуру кирип турар болза, ынчан Бисче бүгү оруктар ажык. <…>

Хүн-бүрүнүң ажылы

176. <…> Эң ылаңгыяда, хүн бүрүнүң чымыш-ажылындан кижилер коргар. Оларга ол боттарын куду кылдыр көөрүнүң болгаш туруптарының демдээ. А Биске хүн бүрүнүң чымыш-ажылы дээрге өөрү үнери болгаш боттарывысты сайзырадып алырывыс-тыр. Ол Кызыгаар Чок Делгемниң Эжиин ажыдып турар. Хүн бүрүнүң чымыш-ажылынга ынакшып болур, чүге дээрге ол сеткил-сорукту дадыктырып турар болгаш күш-ажылчы чүс-чүс чылдарның дизииниң төнмезин бодаар эрес-дидимни берип турар. Кым-бир кижиге ол коргунчуг, ындыг-даа болза сайзыраңгай медерел оларны төнчү чок чогаадыкчы ажылдың үндезини деп хүлээп алыр. Хүн бүрүнүң бердингени болгаш Иерархияга чалбырааштыг ынакшыл бар деп медерел кайы хире онза чаражыл. <…> Чагыг кыска болуп болур: «Чүректериңер одун кыпсыңар, ынакшыл-биле чогаадып, тургузуп, бүдүрүңер».

177. <…> Бердингени-биле бүгү эжиктерге чедип болур. Ону бичии-даа үе иштинде утпаалыңар. Ылап-ла, бердингениниң хүлүмзүрүү-биле боттарывысты долдуруп алгаш, хүн бүрүнүң чымыш-ажылын йөрээриңер… Хүннүң-не Дээдиге өөрүп четтирээлиңер.

179. Дагзып кааш, олурар кижи - өлүг, эдерип чоруп олурар кижи - дириг. Бистер өлүг мөчүлер дажыыр дивээн Бис, а эрес-дидим, Бисти эдерер кижилерни углап-баштаар деп дагдынган Бис. <…> База ол ышкаш Бистиң Айтыышкыннарывысты дораан билир херек, чүге дээрге хүн эртен азы дүьште ийи аңгы чырыдып турар. Бисти хүн бүрүнүң чеми дег кылдыр хүлээп алыр херек. Ынчалза-даа бердинген кижи бүгү күжүн салып, кызар болза, ынчан харыызын ап болур. Баштыңчы Бурганны эдерип чоруур кижилерниң шимчээшкини ындыг болур. Бистиң дузавыс сөөлгү шакта келир деп чүвени билир силер, ынчалза-даа Бистиң медээ чедирер шапкынчывыска эжикти хагбас болза эки. (Чүге дуза сөөлгү шакта кээрил дээрге кижи кадыг-бергени, айыылды боду ажып эрттер ужурлуг. Бир талазында, кижи кармазын боду арыглаар, ийи талазында, кижи кадыг-бергеге дадыгып, сайзыраар. Кижи боду шыдавас-тыр деп чүве билдине бээрге, Башкылар дузаны сөөлгү шакта чорудуп бээр. Ш. Ондар). Бистиң салдар-дузавыс ырак далайлар артындан болуп болур, ындыг-даа болза, Бисче чүткүлдү үзүп болбас.

180. Удуртукчудан аңгыланырга, сүлдениң сайзыралын доктаадыптар, чүге дээрге илчирбе-дизигден хоорлу бээрге, аңгыланыышкынга чедирер болгаш сүлдениң чогаадыкчы чоруун моондактаптар. Чүгле Чырыктың Үндезини-биле чаңгыс-эп, сүлдени, ылап-ла, буруңгаарладыр! Ынчаар Дээди Иерархияже чүткүл бүгү аргаларны бээр болгаш Бараан Болурунуң күчү-күжү-биле сүлдени долдуруп турар. Кызыгаар Чок Делгемче орук ынчаар тургустунар.

181. Ынчангаш Дээди Күзел-Сорукту күүседирин медереп билири ындыг чугула. Ынчангаштың каттыжыышкынның күчү-күжүн тургузуп турар, чүге дээрге чүгле медерелдер каттыжыышкыны чогаадыкчы тудуп- тургууушкунну болдурар. Деңзигүүр, турум байдал чок болганындан кижи төрелгетен ындыг күштүг буурап-сандарап турар болгаш планетада болуп турар чүүлдер Дээди Медерел-биле аңгыланыышкынны көргүзүп турар. Өөреникчилер Иерархияны медереп билиринче чүткүүр ужурлуг деп чугаалап болур. Дээди Күзел-Сорукту күүсеткени-биле ынчаар чедип ап болур.

Өөрүп четтирери деп чүл?

182. Өөрүп четтирери чөптүг, шын чоруктуң кол шынарларының бирээзи. Чөптүг чорук чокта, Өндүр Улуг Бараан Болурунуң оруун чедип алыры болдунмас. <…> Өөрүп четтириишкин кайы хире чараш ийик, ол чүректиң одун чииги-биле кыпсып турар болгаш Баштыңчы Бурганның чанынга турганы ышкаш, сүлдени чаагай сеткил-биле долдуруп турар. Өөрүп четтирбес кижи, бир дугаарында, чаагай сеткилдиг эвес. Эрткен чуртталгаларда чыып алган буянны чаагай сеткил дээр бис, чүге дээрге, Чер кырынга чаагай сеткилди чүгле ада-иезинден деп санап эгелээн. Эң-ылаңгыяда, өөрүп четтириишкинни сайзырадыыр херек, ол бердингениниң дуңмазы-дыр. Башкыга эң-эки аргаларны таарыштырарының кайы хире бергезин медереп билир херек. Бодунуң чүрээниң оду-биле дузалаарын билир херек.

185. Эки, чаагай деп билиг кирип турар сөстерге ынак Бис. Ындыг-даа болза оларның бирээзи Бистиң ёзу-чаңчылывыска таарышпас, ол – шупту чүве эки, менди-чаагай-деп домак. Кижи төрелгетенниң төөгүзүн шинчилеп көрүңер-даан, шынап-ла, кажан-даа өндүр улуг чүве эки-чаагайның азы чыргалдың аразынга тургустунмаан - деп бүзүрээр силер. Ыдыктыг моондактар дугайында шагда-ла Чугаалап Келдим, ынчалза-даа маадырлыг чоруктуң демиселинге кым-даа ынак эвес. Демиселге өөренири албан херек, оон башка сүлдениң селемезин дадыктырары болдунмас. Чер кырынга буруңгаарлаарынга-даа, ырак делегейлерге-даа моондактар эргежок чугула, оларны ажып, тиилеп билири база эргежок чугула. Оожургал, сагыш амыры Иерархка таарымча чок.

186. <…> Шыңгыызы-биле наркотиктерге, оожургадыр болгаш угаан баксырадыыр эмнерге удур Бис. Келир үениң чуртталгазынга херек бодалдарның шынарын канчап сайзырадыыр бис, бир эвес ону хоран-биле дөгейлендирип алыр болзувусса? А кадык-камгалал чери дириг өлүг кижилер кылып бүдүреринге харам чок!

187. Мөңге демиселди шын билир болгаш медерелди частыышкын мурнунда дег тургузар херек, чүге дээрге ол амгы амыдыралга дүгжүп турар. Демисешкен кижилерни башкарарындан Мээң Холум шылавас, ынчалза-даа чыргалда удаан кижилерни Мээң Караам көрүп шыдавас. Кызыгаар Чок Делгемни мурнунга көрүп тура, чаңгыс-даа шак халас эртирбези болгаш минут бүрүзүн ажыглаарын үнелээри йогизм ол-дур. Кажан сүлде Дээди Делегей-биле анаа харылзажып, чүрээниң чырыткыларын кыпсып турар болза, ону шын орук деп чугаалап болур.

190. Хөй-ле аарыгларны психиктиг энергия-биле эмнээр херек-деп Чугаалап Турумда, ону дорту-биле билир болза эки. Нерви бүдүмелиниң аарыг чыпшырары янзы-бүрү аарыгларның кезээде бирги чылдагааны болур. Нерви бүдүмелиниң аарыг чыпшырып, үрелген черинге дээди делегей-биле адакы делегей катчып турар; нерви бүдүмелиниң ойбак черинден көзүлбес делегейниң чүүлдери кирип кээр, кара чүүлдерден эгелээш ракка чедир. Нерви бүдүмелин чүгле психиктиг энергия-биле камгалап болур. Психиктиг энергияны ажыглап билири кижи төрелгетенге ёзулуг баш удур камгалал болур. Нерви чыдыннарының эжиктерин камгалап, оода арыг бодалды ажыглап болур. Бо бөдүүн хемчег безин ажыктыг. Оон ыңай, билдинмес аарыг үезинде психиктиг энергия эң эки арыглакчы болур. Арагалаашкын болгаш янзы-бүрү четпес чоруктарның салдарындан нерви бүдүмели дыка коргунчуг үрелир. Нарын нервилер кижиниң мага-бот сөөктерин (скеледин) солуп турар көзүлбес мага-боттуң кандыг байдалдыг апаарын бодаңар! Чер кырынга -- сөөк, Көзүлбес Делегейге -- нервилер, Сүлдеге -- Чырык.

Иерархияның Күчү-Күжү

191. Ам база Ирерхияже Кичээнгейни Салыйн. Иерархия дизиинден аңгыда, кым-даа нерви бүдүмелин быжыг кылып шыдавас. Иерархияны хүлээп көөрүн кижилерден канчап чедип алырыл ынчаш? Ооң дугайында дыңнап турар кижилер безин ону амыдыралының байдалы кылдыр хүлээп көрбестер болгаш ооң-биле боттарынга болгаш улуг планга хора чедирип турарлар (улуг план – социализм тургузары. Ш. Ондар). Иерархияга удур хора чедирери солуттунмас болгаш арыглаттынмас, ону частырыг деп-даа чугаалап шыдавас Мен, ол — үзелинден ойталаашкын; сиилеңи эвес, а өскерликчи чорук-тур.

194. <…> Иерархияның чагыргазы дээрге чогаадып, тургузарының оду долган күчү-күш-түр. Иерархияга чагыртыыры дээрге-ле Ниитиниң Чаагай Чоруунга от өргүүрү-дүр. Кижилерниң билиишкининге бо билиг дыка бүлүргей хып турар! Мооң дугайында билиишкин чок медерел чүгле бедик сөстер сымыраныыр, а чуртталгаже ону киирип шыдавас, чүге дээрге чүгле Иерархияның өндүр улуу-биле долдунган чүрек Октаргай хоойлузунуң бүгү өндүр улуун билип болур. Сорунзаже тыртыжыышкын чүгле Иерархияны медереп билири-биле болдунар.

195. Иерархияның илчирбе-дизии делегей тудуп-тургузуушкунун хоойлу ёзугаар чорудуп турар. <…>

196. Бараан Болурунуң оруунче киргениниң демдээ кандыг болурул деп силерден айтырып болур. Бирги демдек: эрткен үеден ойталаары болгаш келир үеже долузу-биле чүткүүрү. Ийиги демдек: Башкыны чүрээнге медереп билири, чүге дээрге черле ындыг эвес, а оон башка хоржок. Үш дугаарында: коргуш чок болуру, чүге дээрге Баштыңчы Бурган-биле чепсегленген кижи чүге-даа аштырбас. Дөрте: чүве бактавазы, чүге дээрге келир үеже чүткээн кижи эрткен хүннүң боктарынга дээр үези чок болур. Беште: бүгү үени келир үеге херек ажыл-биле долдурары. Алды дугаарында: Бараан Болурунга өөрүүрү болгаш делегейге ажыктыг болзун дээш, бодун өргүүрү. Чедиде: ырак делегейлерже, чайлаш чок орук кылдыр, сагыш-сеткилиниң чүткүлү. Бо демдектерден Бараан Болурунга белен сүлдени көрүп каар силер, ол Баштыңчы Бурган дээш каяа селеме көдүрерин билир болгаш ооң сөзү чүректен үнген болур.

212. <…> Иерархияның бары – бүгү чуртталганың үндезин-дөзү-дүр. Иерархияга Бараан Болурундан өске, эки сорулга турбас.

213. Чаагай чорукче чоруп турар күш делгемге кезээде көвүдей бээр болгаш үстүү хүрээлеңнер-биле харылзаа болу бээр. А багай чүүлдер кылган күш дедир кээр. Кылдынган багай чүүлдерниң согуннары дыгыйланган эң кудуку каъттарны дүшкүүредиптер болгаш дедир согуг чайлаш чок кээр. Чырыкче чоруткан бодал бүрүзү чырык херел үндүрер, а багайның согуну, чоруткан кижиниң бажынче кадалып болур. Сагыш-сеткил талазы-биле ындыг чүүлдер хөй, ынчангаш делгемни бокталдырбас болгаш бодалдарның шынарын бедик тудар херек.

214. Кажан кара күштер Ак Акыларже боттарының согуннарын чорудуп турда, ооң түңнели боттарынга-ла үрелиишкин болдурар болгаш дедир согуг оларга чайлаш чок дээр. Силерниң дыңнаан чүүлүңер – боттарының сандарап-буураанының уржуу-дур, чүге дээрге, чоруткан согун чоруткан кижиниң бодунга барган-дыр, ынчангаш кижи бүрүзү Бистиң Күжүвүстү билип алзыннар. Бистиң Күчү-Күжүвүске болгаш Иерархияга долузу-биле бүзүрээр кижиге чүү-даа дегбес. Бистиң Херелдеривис кезээде таңныылда болгаш Бистиң Холувус туруп, шылавас. Иерархияның бүгү Күчү-Күжүн ынчаар билир херек.

Бодалдың уржуу

215. Бодал дээрге делгемниң амытаны-дыр. Бодалдарның хевиринче хөй-ле кичээнгейни угландырган, ынчалза-даа хевиринден аңгыда, оларның уржуун эвээш билип турар. Ол кадында, чогум-на уржуу-биле долгандыр турар чүүлдерге хөлчок хора чедирип турар. Үн кижиниң манавааны чүүлдерге салдар чедирип турар. Бодал база ынчаар нарыны-биле салдар чедирер. Бодунга хараадап, хомудаан кижи акшазын чидирип ап болур азы хорадаан кижи аар буруудадыышкынга таваржып болур – улчумал бодалдарның салдары ындыг янзы-бүрү болур. Бодал бүрүзү уржук чок артпас деп чүвени сактып алыр херек. Ол дыка ыракта кижиге дээп болур, оон салым-чолдуң бөмбүү бодунуң өгбезин тып ап болур. Маңаа таварылга деп чүве турбас болбайн аан, ынчангаш бодалдың ужудуушкунунуң хээзи нарын. Аргалыг болза, бодалдың уржуун хайгаараар херек.

217. Сүлдениң бир күштүг шынарларының бирээзи — туруштуу болур. Кажан туруш чокта, медерелди канчап сайзырадып, делгемчидерил! Кижи бүрүзүнүң оруунга чүгле чаңгыс өскерилбес Күчү-Күш – Иерархия бар! Бо хайыралыг Принцип-биле бүдүрүп, тургузуп болур; бо хайыралыг Шыпшыктан делегейни хайгаарап болур; бо Чөлеңгиишке сеткил-сорук чалгынналып болур; бо Шыпшыкка күчүлүг хөгжүлде тургузуп болур. Кажан сүлде бодунуң эрге-ажыын бодаан хоозун делегей тургузарын кызар болза, бурунгаарлаары берге. Төнчү чок чогаадыкчы, тургузукчу ажылга орук айтыыр от – Иерархия бар. (Иерархия дээрге – Бурганнар-дыр. Ёзулуг ылап шын Бурганнарда, оларны хүлээп ап, оларга бүзүреп, оларның-биле харылзажып, ажылдаар болза, кижи төрелгетенге кайы хире ажыктыг-дыр! Ам хүлээп алыр деп турарывыс Конституцияга немелделерде Бурган деп сөстү болгаш билигни ап кааптар, ооң херээ чок, кижи бүрүзүнүң Бурганга бүзүрээр, бүзүревези ооң бодунуң хуу херээ-дир, шупту кижилерни хүндүлээр ужурлуг бис, чүдүкчү, чүдүлге чок деп аңгылавайн-деп, бир чогаалчы ынча дээн деп, солундан номчудум. Бурганга бүзүревес улус бар дээш, шынны чондан чажырар эвес. Мынчага чедир Бурганга бүзүревес кижи чыдып калган, бүдүүлүк кижи болур. Чоннуң хөй кезии Бурганга бүзүревес, мелегей хевээр артпышаан. Шын эвес материализм өөредииниң атеистиг суртаалының хоразы ол хире болган. Ш. Ондар).

218. Ынчангаш Иерархияны базымчалаары дээрге – өскерликчи, саттыныкчы чорук; Иерархияга тоомча чок хамаарылга – өскерликчи чорук; Иерархияга хамаарышкан болуушкуннарны херекке албазы – өскерликчи чорук деп билип алыр херек, ынчангаш эдипкен сөзү, кылган херек бүрүзү дээш, харыысалгалыг болурун чугаалап тур Бис. Иерархияже оттуг чүткүлдү канчап тургуспас боор!  Эң хайыралыг от – Иерархия-ла болгай! Ынчангаш кижи бүрүзү бодунуң ажыын бодавайн, Иерархияны базымчалавайн, сиилең болбайн, бодунуң дужун хараар кижилерни өттүнмейн, Иерархияга канчаар эң эки бараан болурун бодаар болза эки. Оттуг Иерархияны медерелдии-биле хүлээп ап, кады ажылдажылга кылганы дээре.

 227. Бүгү эгелээшкиннерниң амыдыралчызы, амыдыралга боттаныыры Иерархияның оттуг принциви-биле тургустунар. Чүгле Дээди Иерархияның принциви тургузуушкун бүрүзүнге чүткүлдү болгаш турум чорукту бээр. Кижи төрелгетенниң чогаадыкчы, тургузукчу ажылы ол тургузуушкуннардан хамааржыр болгаш чүгле Дээди Илчирбе-Дизигге каттышканы чугула херек күштү бээр. Илчирбе-дизиг бүрүзү улуг илчирбениң кезээ болур болгаш ол Илчирбениң күчү-күжү Октаргайда тергиидеп, хааннап турар, ынчангаш хөгжүлде азарганчыг бичии-даа дизигни Иерархияның өндүр улуг, төнчү чок Илчирбе-Дизиинге каттыжарынче идигни берип, күжендирип турар. Шак ынчаар оттуг Иерархияның күчүзү тергиидеп турар, ылап, ылап, ылап!

228. Иерархияның илчирбе-дизиинге канчап коштунуп алырыл? Чүгле чүрек-биле болгаш Аңаа Бараан Болурунче төнчү чок чүткүл-биле; чүгле Баштыңчы Бурганнарның планын долузу-биле билип, угаап алыры-биле болгаш сүлдениң чогаадыкчы ажылы-биле. <…>

236. <…> Витаминнерни медереп тургаш чиир болза, ооң ажыктыы хөй катап көвүдей бээр деп чүвени көрүп болур. Ажынып, хорадап тургаш чиген витаминнер империлди күштелдирип болур деп эскерип болур (империл – ажынып, хорадаарга организмниң үндүрүп турар хораны. Ш. Ондар). Чем чиирин чүге ыдыктыг деп буруңгу кижилерниң санап турганын билип болур. Медереп билири шупту энергияларны кайы хире улгаттырыптарын билип болур. <…>

Чарааның күжү

240. Кажан кижилер чүгле оттарны болгаш херелдерни эвес, а кижилерниң бестериниң ылгап үндүрүп чоруур чүүлдерин база шинчилеп эгелээр болза, ынчан мага-боттуң өскерлиириниң дугайында бодап болур. Кижилер боттарының мага-бодунда болуп турар химиктиг болуушкуннарны билип турар хирезинде, ооң үндүрүп турар чүүлдерин херекчок бокка дөмейлээри элдептиг. Ханның азы чарааның кайы хире күштүүн көрүп болур. Үнүштер делегейиниң ханы, азы валериан, үнүшке кайгамчык күштү берип турарын көрүп болур. Ол ышкаш, чараа болгаш бестерниң өске-даа ылгап үндүрүп турар чүүлдери хөлчок күштүг болур. Ол чүүлдерниң энергиязының салдарының улгадып, бичиилеп турарының чылдагаанын хайгаарап көөр херек. Килеңниң чараазы хоранныг, чаагай чоруктуң, буянның чараазы буянныг. (Буянныг кижи аарыг кижини чараазы-биле тарбыдапкаш, ону экиртип болур. Багай кижи кижиже чараазы-биле дүпкүрүп, каргапкаш, ону өлүрүп болур. Ш. Ондар).

244. Чүве ыыттавазы дээрге чүве кылбазы эвес-тир. Ыыттаваңар деп сүмелеп турумда, удуй бээри эвес-тир, а харын Иерархияның күжү-биле үн катчып, аяннажыыры-дыр. Шупту чеди харлыг уругларны Иерархияны сактып алырынга өөредир херек, чүге дээрге чеди хар соонда медерелге бүгү назынында балалбас ис артып калыр.

258. Октаргай тудуп-тургузуушкунунга бүгү чайладылга-солчулгалар күжени бээр болгаш чон бүрүзү бодунуң кармазын болгаш бодунуң хөгжүлдеге туружун тургузар. <…> Чон бодунуң төөгүге буруңгаарлаашкынын, бодунуң өөрү депшиириниң чаяагаар чүткүлүн чүнүң-биле, канчаар камгалаарыл? Чүгле Иерархияның дузазы-биле болгаш Дээди Күзел-Сорукту билири-биле. Бо быралар кижи төрелгетенни баш удур көрүп каан тургузуушкунче углап болур. Бо медерел-биле үстүү хүрээлеңнер-биле кады ажылдажылгаже чоокшулап болур. <…>

262. Бистиң тудуп-тургузуушкунувус чуртталганың кандыг-даа байдалында үргүлчүлээр. Планетаның берге байдалын дыка хөй катап көрүп болур турган силер. Чуртталганы чаартырының чугулазын хөй катап чугаалап турган Бис, а кижи төрелгетен дүлей. Кижилер Октаргай дугайында өөредигни чуртталганың үндезини кылдыр ажыглавас, а чем ышкаш чиптер. Хөй шинчилекчилерниң даап бодаашкыннарын хүлээп ап турар, а Иерархияны хүлээп албас, ону медереп билбестер. Хөй согуушкуннар кээри манаттынып турар, Иерархиже бүгү күш-биле чүткүп, чоокшулаар херек! Бистиң сүмелеривисче бүгү кичээнгейни углаар херек! Куруг черге эвес, мону ажыглаар кылдыр чугаалап тур Мен.

263. Сүме бүрүзүн каш-даа катап берген Бис, а кижилерниң чуртталгазы өскерилбес, ол-ла хевээр. Делгемни долдурар херек, чүге дээрге дыңнакчылар хөй. Оларның кандыг мага-ботта чорууру дөмей-ле эвес чүве бе? Силер шупту берге байдалды билип турар силер. Баш удур айыткан чылды кижи бүрүзү бодунуу-биле билип турар. Ынчангаш, чугаалап тур Мен – кадыыңар камнаңар, сергек болуңар, чүге дээрге, Бис чокта, шимчээшкин чок. Үш кулак-биле дыңнаңар.

264. Төгүлген ханга делгемниң амыттаннары чыглыыр деп айтып турар. Ол ылап ындыг. Оон ыңай бестерниң ылгап үндүрүп турар суук чүүлдери база шак-ла ындыг шынарлыг деп чүвени утпас херек. Делгемниң каракка көзүлбес амытан бүрүзү ханче болгаш чарааже чүткүүр. Хуулган кеъшче база олар чагдап болур. <…> (Шаанда тывалар дүкпүрген, сиңмирген чараа, думаазын довурак-биле хөме идип каар чораан. Ам бо шагда хоорайның кудумчулары базым санында чараа-думаа болур. Бир талазында, чоннуң культура чогу, ийи талазында, чараа-думаа дамчыштыр көзүлбес чүүлдер ооң ээзинге хора чедирип болур. Ш. Ондар).

Хорадаары хоралыг

272. Бужурганып, хорадаары – кижиниң оттуг энергиязынга эң улуг хора чедирер. Хорадап эгелээш, он катап хандыр киир тынар болза эки. Агаар энергиязы психиктиг, химиктиг дузадан аңгыда, оттарга эки салдарлыг болгаш хорадаарын намдадыптар.

273. Чагыг чугаа бүрүзүн кижи төрелгетен бодунуу-биле чугаалаар; Үстүнден келген Чагыг бүрүзүн бодунуу-биле өскертип алыр; улуг принцип бүрүзүн чуртталгага бодунуу-биле ажыглаар. <…> Өндүр улуг чүүл бичии чүүлче, Октаргай чүүлү хуу чүүлче канчап кирерил? Угаан-сарыылдың болгаш бүгү кижи төрелгетенниң өндүр Бараан Болукчузу чүгле суугу долгандыр бодаар медерелче канчап кирер боор! Бодун бодавас башкарыкчы хүн бүрүнүң бичии чымыжын канчап билирил! Чүгле кажан Иерархияга бердингениниң сырызы чүректе хып турда, ажык Эжиктерни тып ап болур. Чүгле Башкыга өөрүп четтирери Эжиктерни ажыдып болур. Бодунуң оруун шилип алган кижи бодунуң оруунуң чааскаанзыргайын билип алыр ужурлуг, чүге дээрге, чүгле Иерархияга ынакшылы болгаш бердингени сүлдени Чырыктың Илчирбе-Дизиинге кожуп турар. Шак ынчаар кижи бүрүзү бодунуң кармазын шиитпирлээр. Чүгле Чырык-биле Чырыкче чоокшулаар бис.

285. Ракты психиктиг энергия-биле эмнеп болур, чүге дээрге ханда психиктиг энергия чок болза, аарыг тыптыыр. <…>

286. Дээди Күзел-Сорук! Чамдык кижилер Ооң чүнү күзээрин билир бис дээр, а кижи төрелгетен хөгжүлдениң базымын тоовайн, чүгле бодунуң угланыышкынын көрүп турар. Ынчангаш дедир агымнар көвей, кижи төрелгетен камгалалын чидирип алган, чүге дээрге, Дээди Күзел Сорукка удур чоруп олурар. Дээди Күзел Соруктуң октаргай ужур-утказын ынчаар билир херек.

288. Октаргай хоойлуларын кижи төрелгетен дыка эвээш билир! Шупту чуртталганың тургузуушкуннары Октаргайга чөрүштүр чоруп турар. Ынчаар кижи төрелгетен чүгле дыка эвээш каракка көстүп турар уржуктарын хүлээп ап турар, а Октаргайның эртине-байлаан хүлээп алырындан ойталап турар. Ооң чылдагааны — бүзүревези болгаш билиг чок, дүмбей караңгызы. Ынчангаш аңгыланыышкын болган. Кижи төрелгетенге октаргай хоойлуларын канчап бадыткаар боор, кажан кижи төрелгетенниң мурнунга чок дээр хүлээп көрбезиниң ханазы турда! Өндүр улуг хоойлу бүрүзү чуртталгага болгаш башкарыкчы хоойлуларга ынчаар дүгжүп турар. Чараш чүүлдүң Шыпшыынче эккел чыдар Иерархияның илчирбе-дизиинге ынчаар тудуп, тургузуп болур.

292. <…> Бир эвес Дээди Күзел-Соруктуң чоруткан чүүлү болза, бүтпес деп чүве турбас. Бир эвес Дээди Күзел-Соруктуң чоруткан чүткүлү болза, хүлээп көрбес деп чүве турбас, ынчангаш кижи төрелгетен чүгле Ирерахияже чүткүүр ужурлуг. Ылап-ла, бо Октаргай билиишкининде тудуп-тургузуушкуннуң бүгү аргалары салдынган!

293. Кижи төрелгетен Дээди Күзел-Сорук-биле харылзаа чогундан хилинчектенип чоруур. Ынчангаш Бис чаңгыс чыглыр черни күштүү-биле тургузуп турар Бис, чүге дээрге төп чокта, Дээди Күзел-Сорук хүлээп алдынмас. Ынчангаштың, Бис Иерархияже күштүү-биле кыйгырып турар Бис. Ылап-ла, үнелиг эртинелерни чажыт шыгжаар херек, ооң-биле Бис ажыл-херектеривис тургузуп алган Бис. Үнелиг чогаадыкчы ажыл бүрүзү хөгжүлдеге салыг болур. Өндүр улуг бодалдың ужур утказының дугайында бодаалыңар, оттуг Тараның улуг күчү-күжүнүң дугайында бодаалыңар, чүректиң бердингениниң дугайында бодаалыңар, Баштыңчы Бурганның ады-биле чоруп олурар кижилерниң чүге-даа алыспас быжыының дугайында бодаалыңар!

294. <…> Шыны-биле, карма чүгле чүве кылбас кижилерге коргунчуг, а чүткүлдүг бодал эрткен үениң аар чүъгүнден хосталы бээр болгаш дээрниң бүдүмели дег, оруун катаптавайн, чүткүп чоруптар. Ынчаар, аар кармалыг-даа тургаш, ажыктыг хосталыышкынны чедип ап болур.

Иерархия билииниң буяны

295. Кижилер Баштыңчы Бурганга болгаш Иерархияга Бараан Болурун канчаар билип турарын көрүп көрээлиңер. Чүгле мөргүл, чалбарыг-биле өөрүлээр деп бодап чоруур кижи Бараан Болурундан ырак. Кижи төрелгетенниң Чаагай Чоруунга Бараан Болур дээн чүткүлдүг кижи Баштыңчы Бурганны чүрээ-биле хүлээп алыр ужурлуг. Бодунга эптиин бодаар кижи Иерархияга канчаар бараан болурун билбес. Иерархияның Айтыышкыннарын хүлээп албас кижи Бараан Болурун билбес. Чүгле кажан чүрек Дээди Күзел-Соруктуң бадыткалын медерелдии-биле хүлээп алырынга белен болза, ынчан Бараан Болуру хүлээп алдынган деп болур. <…> Сөс-биле эвес, а ажыл-херек-биле хүндүткел көргүзер херек. <…>

298. <…> Өндүр Улуг Иерархияның дизии бүгү делегейге чуртталганы берип турар, бо хоойлуну хүлээп алыры чаа энергия кирерин ажыдып болур. Ынчаар эң-эки чаданы тургузуп ап болур. (Бир-ле чаа чүвени билип, хүлээп ап чоруур болза, ол кижиге энергия берип, дузалап чоруур болур. Эң ылаңгыяда шажын өөредиглеринден. Кижи Октаргай хоойлуларын, шажын өөредиглерин хөйнү өөренип, билген тудум, ооң медерели, сагыш-сеткили сайзырап олурар, ооң буяны кижиге дузалап чоруур апаар, бурган деңнелинче азарганчыг-даа болза чоокшулап олурарың ол. Ш. Ондар).

299. Билиишкин бүрүзү боду деңнежилгелиг, деңзигүүрлүг болур. Иерархияга чалбарып, ону хүндүлээри даанылга деп билиг-биле деңнежилге тудуп турар. Бир эвес үстүнче, Иерархияже хүндүткел болза, Иерархиядан адаанче даанылга. (Мооң утказы: бир эвес Иерархияга чалбарып, аңаа бүзүреп чоруур болза, Иерархия харыы кылдыр камгалалынга ап, дагдынып азы даанып алыр. Даанып дээрге – камгалап, дузалаар бис - деп хүлээнип ап турар дээн уткалыг. Ш. Ондар). Харын-даа даанылга сагыызыны бар. Кажан Иерархияны медереп билип турда, даанылга үрелбес. Башкының кайы хире өскерилбези дег, даанылга ол хире быжыг болур деп херечилеп тур Мен. Ынчангаш «Башкы» деп сөстү сиилең, бодал чок чугаалавайн чоруңар. А чугаалап тургаш, мөңгүн удазынны үзериниң дугайында бодаваңар. (Мөңгүн удазын дээрге – Башкы-биле кижиниң аразында тудушкан, каракка көзүлбес мөңгүн удазын, Башкы-биле тудуш харылзаа. Ш. Ондар). Сиилең кижи ооң уржуун бөдүүн чижекке безин көре бээр. <…> Мөңгүн удазынны үзерге, чүү болурул? Кортук медерел база-ла коргудуп тур деп бодаар, а хоойлу бүрүзүн, азы кандыг-бир машина бүрүзүн шын эвес ажыглаар болза, багай, эпчок чоруктарга таварыштырып болур.

302. Кижилерниң чүткүлдерин кезээде Чырыкка азы караңгыга (кара-күштерге) бараан болуп чорууру-биле хемчээр. Мооң-биле оларның чуртталгада сорулга, хүлээлгезиниң дугайында чугаалап болур. Эң-не багайы чартык-чамдык, арам-безерек бодалы болгаш арам-безерек чүткүлү. Үрегдекчилер кезээде чүгле арам-безерек чүткүл-биле тургузуп турарлар. Чартык, арам-безерек бараан болукчу дег багай чүве чок, чүге дээрге, ол арам-безерек чорукка чаштынып чыдар, ынчангаш Чырыктың дорт дайзыны-даа оон дээре. Туманда соястап үнүп кээр бичии шыйлашкыннарны улуг тулчуушкуннарже албас Бис. Арам-безерек чорук херекчок. Кажан-даа, бүгү аргалар-биле арам-безерек кижилер-биле чугаалажып, харылзашпас херек. Бир эвес өөреникчилер арам-безерек болза, оларны мүң чыл аткаар октаптар. <…> Чырыкка бараан болган кижи арам-безерек чорукка хөңнү чок.

Махатмалар деп кымнарыл

304. «Махатма» деп сөстү «Өндүр Улуг Байлак Сеткил» (Великая Душа) деп очулдурар («Махатма» дээрге – Шамбаланың Бурган-Башкыларын ынчаар адаар. Ш. Ондар). Чамдык кижилер Махатмаларны көңгүс аңгы раса деп бодап турарлар. Өндүр Улуг Сеткилди көңгүс аңгы деп билбес херек. Өндүр Улуг Сеткилдиң берге оруун дидим чүткүлү-биле шилип алган Махатма бүрүзү бодунуң өөрү үнүүшкүнүн калбак чон аразындан эгелээн. (Бурганнар дээрге Черге азы өске планеталарга чурттап чорааш, дээди сайзыралды алган   кижилер болур. «Кижи болуп чорбаан бурган чок»-дээн. Ш. Ондар). Ол дидим чүткүлү-биле кады чүрээнге сүлдениң килең-хөлзээшкинин ажыткан, оон башка оттар кайыын хып кээрил? Ол оттарга бестерниң үндүрүп чоруур суук чүүлдери үнелиг эмнээр бүдүмелдер кылдыр шилчип турар. Ол оттуг амытанның (Махатманың. Ш. Ондар) чараазы ыжыктарны чидирип, өлүгленген төптерге чуртталганың энергиязын берип турар. Хол салып эмнээриниң күжү-биле кады бестерниң ылгап үндүрүп турар чүүлдериниң (чарааның дээн ышкаш) үнелиг эмнээр шынары туруп турар. <…>

306. <…> Ынчангаш дээди хоойлу Бүгүдениң Чаагай Чоруунче чүткүүр, а кижи төрелгетенниң сүлдезинге дээди хоойлуже чүткүүрү негеттинип турар.           

307. Ынчангаш кижи төрелгетен дээди хоойлуларның чаражын билир ужурлуг. Иерархияны ылап билири болгаш ону хүндүлээринден өске чүү чүве тургузукчу ажылче орук айтып бээр боор? Иерархия хоойлузун эдереринден өске чүү чүве сүлдени Дээдиже үндүр тыртар боор? Иерархияны билиринден өске чүү чүве кижини Ылап Шынче углаар боор? Ынчангаш дээди билиишкинге Иерархияны чүрээ-биле хүлээп алыр болгаш Иерархияның дээди хоойлузунче салдыкпайн, чүткүүр херек.           

310. Кажан Чырыктың болгаш Караңгының Күштери күштелип турда, кадыкты камнаар херек, чүге дээрге, делгемниң оду хөрлээлеп хып турар болгаш караңгы дүшкүүреп турар. Ынчалза-даа, Бистиң бүгү илерээшкиннеривиске тиилелгени көөр херек. Кажан эрги болгаш хөгжүлдеге, база от эпохазынга таарышпас чүве үрелип, буступ турда, кижи төрелгетенни камгалаар, бүгү илчирбени каттыштырыптар болгаш бүгү күчү-күштү бээр чаңгыс өртег (якорь) – Иерархия артып каар. Ынчангаш, Иерархияга төнчү чок бүзүрээр херек.           

312. Чайгылчак кижилерни хайгаараар херек, чүге дээрге олар хөлчок хоралыг. Оларның кара талаже кире бээри мыяада, оларның чүве бактап, тарадыыры хөй буруу чок кижилерни балыглап турар. (Бистиң үеде безин боттары караа-биле көрбээн хирезинде, чүве бактап, хоп тарадыыр кижилер эңдерик. Боттарынга-даа, ниитилелге-даа кайы хире хора чедирип чоруурун билбестер. Ш. Ондар).           

315. Делегейниң эде тургузуушкуну Октаргайның бүгү күштерин күжендирип турар. Бир эвес кижи төрелгетен эде тургузуушкун сүлдениң чүткүлдүүн негээр деп билген болза, делегейге турум байдалды чииги-биле тургузуп ап болур ийик, а кижилер деңзи кырынга чүнү салырын болгаш ооң кайнаар чая база бээрин бодавайн турарлар. Бодалдың үен-даяны кижи төрелгетенге хөлчок хоралыг болгаш холушкан чоннар адаанче куду бадып турар, а сагыш-сеткилди чаартып, сайзырадыыр хемчег албайн турарлар. Сагыш-сеткил байлаан дилээрин бодаар үе келген. Кажан Октаргайның хенертен болур өсерлиишкиннери улуг күжениишкинни негей бээрге, кижи төрелгетен камгалал төвүн кайыын дилээрин билир болза эки. Ынчангаш, сагыш-сеткил төвүнүң дилээшкини, чайлаш чок, Иерархияга эккээр. Кижи төрелгетен камгалалдың херек хевирин чидирип алган. Ынчангаш камгалалдың эң сөөлгү идегели – Иерархияның төвү болур. Чүгле медерел-биле дилээри болгаш Иерархияны хүлээп алыры камгалалды бээр, ылап, ылап, ылап!           

317. <…> Кижилер, болганчок-ла, ажыл-ижиниң чедимче чок болганын кайгаарлар. Шупту эң-эки чаяагаар чүткүлдерни кылганнар бе – деп, чугаалаар Бис. Бодал чок сиилең чорук, шиченгир эвес, шүшпең чоруктуң мелегейи болгаш чүве тоовазы кире бербээн бе, азы Иерархияже чүткүлдүң чогу ол эвес бе? <…>

Дайзыннар дугайында

            319. Дайзыннарны узуткаарынче чүге далашпас Силер? - деп айтырып турарлар. Чылдагааннары хөй, оларның ийизин адаалыңар: бирээде – карма байдалдары. Чоок кижилеривис-биле харылзаалыг дайзынга деггеш, чоок кижилеривиске хора чедирип болур бис. Бо байдалды, кажан эмчи айыылдыг хан дамырынга дегбес дээш, аарыг мага-бот кезээнге дегбес аар кезиишкинге дөмейлеп болур. Кажан карма харылзаазы турда, удур-дедир харылзаа хамаарылгазы анаа эвес, нарын болур. Бисте бүгү караванны үрээриниң орнунга, чаңгыс айыылдыг аян-чорукчуну аңгылаары ажыктыг деп санаар. Ийи дугаар чылдагааны: дайзыннар энергия күжениишкининиң үнер дөзү болур. Удур туруушкундан аңгыда, чүү-даа чүве ынчаар энергия бербес. Кажан каралар бистиң энергиявысты улгаттырар дээш бүгү күжү-биле кызып турда, чүү дээш кылымал моондактар чогаадырыл?           

323. Курт-хымыскаяк безин Иерархияның өндүр улуун билир. Чуртталганың үндезиннерин билири амыдыралды өскертип болур, ынчангаш чүгле Иерархия хоойлузунуң өндүр улуу хөгжүлдениң дээди чадаларынче кижи төрелгетенни углап болур.           

328. Кижилерге боттарының чаагай чоруу чүнүң-биле тургустунуп турарын бодаары берге! Тургузуп турар бис деп бодап турарлар; ажылдап турар бис деп бодап турарлар; олар чокта, чүү-даа бүтпес деп бодап турарлар; шупту чүвениң үндезин-таваа бисте деп бодап турарлар. Боттарының бүдүжүнден үнмейн турар чүвени бистии деп бодап турар кижилерниң шорузу, чүге дээрге олар караңгының чалчалары, ылап-ла, чырык эгелээшкиннерниң үрегдекчилери болуп турарлар. Караларның ол оралдажыышкыннары оларның өлүп турарын бадыткап турар, чүге дээрге, Чырык тиилеттирбес. Кайда Чырыктың Иерархиязының сөзүн тооваан болдур, ында чаягаар буураашкын, сандараашкын болуп турар. Караларның чогаадыкчы, бүдүрүкчү ажылды бистии дээри үндезинниг, чүге дээрге, ылап-ла, дииреңнер Чырыктың кады-ажылдакчылары ышкаш болуп келгеннер! Багай чүве кылыр дээн сагыш, бодал бүрүзү тиилелгени бадыткап турар.           

329. Иерархияны билирин күзевес каралар ылап-ла согур болганнары ол   бе? Дээди хоойлуну билип алыры -- камгалалдың чаңгыс аргазы деп чүвени билбестери ол бе? Шиитпирлиг үеде Иерархия Хоойлузун билири кайы хире чугулал! Ынчангаш, Иерархияга удур чоруп турар караңгының бараан болукчулары болгаш өскерликчилер боданзыннар. Иерархияның адын баксыраткан кижи бүрүзү коргунчуг өскерликчи-дир.           

332. Кижилер чуртталгазынга хөй-ле бичии мегелээшкиннерни эвес, а шынны ажыглаар кылдыр өөренип алзыннар. Бар чүүлдү медерелдии-биле хажыдарындан өске, чүү-даа чүве ындыг үрегдекчи болгаш хоралакчы болбас; ол Октаргайның ритмин үреп турар. Ритм үзүктелиишкининиң үезинде чер адааның оттары кедерей бээр.

Империлдиң хоразы

            335. Кижи төрелгетен хөй чугула дуржулгаларны кылыр ужурлуг. Империлди чоруп турар расаның айыыл-халавы деп санаарындан аңгыда, ооң халдаварын база өөренип көөр херек. (Империл -- кижи хорадаарга организмге тыптыыр хоран. Ш. Ондар). Империл ырак хемчээлдерге болгаш көзүлбес мага-ботка салдар чедирип болур деп санап болур. Империл делгемниң оттарынга таарышпас. Чок апаргаш, черден империл курлавырлыг чоруп турар кижилер хилинчектиг амыдыралдыг болур. Делгемниң оттары оларже угланыр боор, чүге дээрге тааржылга, аяннажылга дээрге үндезиннер эдерери-дир. Үндезиннерге удур чорук бүрүзү делгемнер оттарының удурланыышкынын болдурар. <…> Болганчок-ла кижилер боттарының ажынып, хорадаарын херекке албазын эскерип болур, а айыылдыг хоран оон эвээш апарбас. (Кижиниң ажынып, хорадаары кижиниң бодунга кайы хире хоралыын мында чугаалап турар. Ынчангаш кижи бүрүзү ону медерелинче киир сактып алыр болза эки. Ш. Ондар).           

338. Кижи төрелгетен Иерархияның чер кырында чагырыкчыларын билбейн, Дээдиже канчап чоокшулаар деп турарларыл? Кажан кижи төрелгетен Иерархияның Илчирбе-Дизииниң өндүр улуун хүлээп көрбейн турда, канчап харылзаа тургустунарыл? Бодал бот тогдунарының хораны-биле ол хире хоранналган болгаш, Октаргайның бүгү турум байдалы үрелип турар. Бисче баар орукка Иерархияга хамаарышкан бүгү-ле чүүлдерни сөөлгү идегел кылдыр хүлээп алыр херек. Ылап-ла, Иерархия кижи төрелгетенге кайгамчык Чырык-биле дөмей! Иерархия күчүлүг Камгалал-Щит болуп, таңныылда туруп турар! Иерархия делегейлерниң харылзаазы болуп турар!           

341. Хөй-ле кижилер харыысалганы канчаар билип турарыл? Харыысалганың өндүр улуг утказының дугайында хөлчок эвээш бодап турарлар! Харыысалганы сиилең, чиик көрүп болгаш бодунуң ажыын бодап хүлээп ап турар кижи коргунчуг карманы тургузуп турар. Кажан кижи төрелгетенниң Чаагай Чоруунга өндүр Бараан Болурун берип турда, улуг харыысалгалыг болур херек. Холунда Бистиң сававысты тудуп чоруур Кижи, кайгамчык сава чалгыннарлыг артып калзын дээш, төлептиг болур херек. <…>           

344. <…> Чаа Делегейни дилеп чоруур кижилер Иерархияның Чагыгларынче угланыр херек. Чүгле ооң-биле делегейниң деңзигүүр турум байдалын тургузуп болур. <…> Ынчангаш, Иерархия хоойлузун хүлээп алыры тоң чугула, чүге дээрге, илчирбе-дизиг чокта, өөрү үнериниң чадазы тургустунмас.           

345. <…> Дүн, хүн чок Иерархия дугайын катаптап бодаар херек. <…> Чаа Делегейниң бодарап турарын билбес кижилер, ажырбас, кыжырып тургайлар аан, чүге дээрге, Чаа Делегей дугайында билиишкин бүрүзү оларга коргунчуг.           

346. Кажан хөгжүлдениң тепкииш чадазы тургустунуп турда, каралар бүгү оптуг, кажар аргаларын күштелдирип турар, чүге дээрге, Чырык оларга хилинчектиг, берге, ынчангаш, тиилеттирерин билип кааш, боттарынга боттарын боой тудар хемчеглерни сегирип ап турарлар. (Үстүнде, мында-даа социализм тургузуушкунун Чаа Делегей деп, ону хөгжүлдениң тепкиижи деп адап турар. Ш. Ондар).

349. Кижиниң организминиң ажыл-чорудулгазы нарын энергиялар-биле чоруттунуп турар. Нарын энергияларның болгаш бүгү көзүлбес күштерниң ажыл-чорудулгазын медереп билиринге чаңчыгары кижилерге берге. Ынчангаш, Октаргай-биле ындыг аңгыланыышкын болуп турар болгаш нарын билип алыышкынны сайзырадыырының орнунга, физиктиг мага-бот чүгле материяның үндезиннери-биле кызыгаарлаттынып турар. Октаргай күштериниң чалгыгларын болгаш нарын билиишкин хереглеттинер черлерни дыка эвээш билип турарлар. Дээди хүрээлеңнерже угланган сүлде нарын энергиялар аразында кандыг сорунзалыг харылзаа барын билир болгаш делгемниң бүгү базыышкыннарынга аяннажып, үн катчып турар. Салгалды ынчаар нарын энергияларны билиринге кижизидер херек, чүге дээрге, делгемниң чалгыглары Черже чоокшулап олурар болгаш Чаа Эпоха тургузуушкуну хөй-ле чүүлдерни чайладыптар. Көзүлбес мага-боттар ынчаар бүгү чоруткан энергияларны шиңгээдип алырлар.

От эпохазы

350. Оттуг эпохалар үезинде кезээде бойдус өскерлиишкиннери хенертен болуп турар. Ынчангаш От эпохазында эң-не кол чүве – көзүлбес, нарын чүүлдерни дыыжы шиңгээдип, билип алыры. От эпохазының үезинде Иерархияның соондан чоннуң сүлдезиниң, сүзүүнүң өзүлдезиниң күштүг агымы эгелээр. От эпохазы дээрге Иерархияның эпохазы-дыр! (Бис ам от эпохазында чурттап эгелей берген бис. Ш. Ондар).

354. <…> Чырыктың караңгыга удур тулчуушкуну соксаал чок чоруп турар. Хөй-ле дайынчылар бо тулчуушкунга дузалажып турар, оон башка бис катап-ла сандараашкын, корум-чурум чок байдалче кире бээр бис. Болганчок-ла, тулчуушкуннуң киржикчилери айтырып турар: чүге олар физиктиг мага-боттуг тургаш, көзүлбес мага-боттуг тургаштың кылып турган маадырлыг-чоруктарын сактып шыдавазыл? Ол медерелди киирери Бистиң талавыстан кем-херек үүлгедиишкининге дөмей болур. Ол кайгамчык улуг тулчуушкунну медереп-билгенинден чүрек шыдашпайн барып болур. Ол медерелден азы склерозтан чүрек туруптар. <…>

359. <…> Кижи төрелгетенниң аас-кежииниң үндезини чарашта, чараш чүүлде, ынчангаш Бис уран чүүлдү сеткил-сорук чаартырының дээди идиг бээр чүүлү деп санаар Бис. Уран чүүлдү Бис өлүм чок болгаш кызыгаар чок деп санаар Бис. Бис билиг биле эртемни аңгылап турар Бис, чүге дээрге билиг дээрге уран чүүл-дүр, а эртем – методика, арга-дыр. Ынчангаш бойдус оду уран чүүлдү болгаш сүлдениң чогаадыкчы ажылын күштелдирип турар. Ынчангаш уран чүүлдүң кайгамчык эртинелери сүлдени, сеткил-сорукту көдүрүп, ону дораан-на чаартып турар. <…>

363. Октаргайның хенертен өскерлиишкиннериниң үезинде атмосфераны тырый базып турар болгаш Чаа Делегей тургузарынче оттарны углап турар арыглаашкын оттары көвүдеп, чыглып турар. Эрги делегейниң бузундуларынга чаа хөгжүлде болгаш делгемни Чаа Делегейниң оду-биле долдуруп турар болгаш Кали Юганы (Караңгы Үени) доозуп турар От эпохазы өзүп турар. Шак ынчаар Баштыңчы Бурганнарның бүгү чүвени хаара тудуп турар Тугу арыг чогаадыкчы, тургузукчу ажылче кыйгырып турар. Шак ынчаар Иерархияның бодал, тургузуу чуртталгаже кирип турар. Ынчаар Чаагай Чорукче угланган бүгү-ле чүүлдерге байыр чедирип тур Бис. Үстүкү орук-биле чоруур дээн арыг чүткүл-биле долдунган бүгү-ле чүүлдерге байыр чедирип тур Бис.

366. Психиктиг күштер дугайында билигни кижилер өскээр билип турар! Физиктиг болуушкуннарны психиктиг чылдагаан-биле тайылбырлап болур, а психиктиг болуушкуннарны физиктиг чылдагаан-биле бадыткаары болдунмас. Кажан эртемден бүгү психиктиг чылдагааннарны ап кааптарга, органиктиг болгаш органиктиг эвес деп чидиг аңгыланыышкын тургустуна берген. Сеткил-соруу, сүлдези, психиктиг энергиязы, октаргай оду чок номнар кижи төрелгетенге херек эртемни берип шыдавас деп эртемденнерге айтып болур. Муң-муң чылдарда туруп турар чүүлдерни чүс чылдар иштинде тургустунган чүүлдерден аңгылааны планетаның кармазын дүргедедиир частырыг болган. Ынчангаш кижи төрелгетен психиктиг болгаш физиктиг болуушкуннарны канчаар чоокшулаштырарының дугайында боданыыр ужурлуг. <…>

367. Берип турар кижи кымыл? Бээр чүвези бар кижи-дир. Ол төнмезин дээш, төнмес үндезинден алыр херек. Ол Иерархия-дыр.

370. Эң-не хоралыг кылдыныгларның бирээзи бодунуң частырыгларының түңнел уржуу дээш Иерархияны бактап, буруудадыры. Ындыг мелегей буруудадыышкын, өскерлиишкин ышкаш, Иерархия-биле харылзааны үзүп турар. <…>

373. Ажылда, буяндан кыл, Иерархияны хүндүле – бо Бистиң Чагыывысты чаа төрүттүнген уругнуң адыжынга безин бижип каап болур. Чырыкче аппаарының эгези ындыг-ла нарын эвес. Ону хүлээп алырда, чүгле арыг чүректиг болур.

От принциви

375. От принцивинге делегей чаартынып, эде тургустунуп турар. Энергия төптериниң оду, сеткил-соруктуң, сүлдениң оду, чүректиң оду, маадырлыг чоруктуң оду, чедиишкинниң оду, Иерархияның оду, Бараан Болурунуң оду – бо Чаа Делегейниң принциптери-дир. Ынчангаш, каттышкан медерелдерниң дугазы ынчаар Дээди Күзел-Сорукту тургузуп турар. Ылап-ла, Тайбыңның өндүр улуг Тугу бүгү делегейни шыва аптар! Ылап-ла, өндүр улуг доозуушкуннуң өндүр үези.

376. Каржы болгаш ийи арынныг кижилерге өскерликчи чорук дугайында чугаалаайн. Олар өскерликчи чорук дээрге чүгле үжен мөңгүн чооска саттынары эвес, а бактаары, бак сөглээри база өскерликчи чорук деп чүвени уттуп турарлар. Хорадап, кончуттунган өжээнниг сөстер өскерликчи чорук эвес-тир деп бодап болбас. Шынап-ла, ажынып, хорадаан каржы сөстер нүгүлден болгаш өскерликчи чоруктан аңгыланмас. Чаңгыс кара сыып ол бужар будуктарны чемгерип турар. Бужар бак чоруктуң кара дазылдары дег, ооң уржуу база кара болур. Өжээнниг, каржы сөстерниң коргунчуундан дүрген-не адырлыыр херек.

377. Делегей чаартылгазы эң дээди күжениишкин-биле болуп турар. Бо чаартылганы хенертен өскерлиишкиннер, чайладылгалар, дүжүрүлгелер, шупту аарыглар үдеп чоруур. Эң күштүг энергиялар оттарны кыпсып, шимчедип турар. От эпохазында караңгы күштелип, бүгү чүве оттуг чүткүл-биле күженип турар. Күштелген караңгы багай, хоралыг чоруктарны кылып турар. Чырык делегейни чаартып турар. Ындыг өндүр үеде бүгү-делегейниң өскерлиишкиннери делгемни долуп турар.

От үезинде, кажан Чырык караңгы-биле демисежип турда, Тайбыңның Тугунуң көстүп келири кижи төрелгетенге чаа чаданы бээр кол демдек болур. Ол демдектиң адаа-биле Билиг, Уран Чүүл, Чараш чүүлдер болгаш бүгү чоннар каттыжа бээр. <..>

378. Бузут-бакка, хоралыг чүүлдерге удур туржууру Иреархияны дилеп чоруур кижилерниң кол шынары болур. Физиктиг шынарлары эвес, а сүлдениң болгаш чүректиң оду бузут-бактың кажар, оптуг аргаларынга удур камгалал боор. Хоралыг бузут-бакты канчап билип алырыл? Ол, бир дугаарында, үрегдээри, буурадып, сандарадыыры-дыр. Үрелип, бустуур четкен эрги бажыңны эң-эки, чаа бажың-биле солууру үрегдээшкин эвес-ле болгай? Ынчаарга, үрегдээшкин дээрге хевир чок байдалче киирип, бузары, сандарадыыры-дыр. Ындыг үрегдээшкинге удур туржуп билир херек. Удурланып шыдавас кортук чорукту тиилептер сеткил-соруктуң күжүн тывар херек. Бак чүүлге удурланыырынга белеткенип алзыннар. (Майдыр Бурган социализмни, ССРЭ-ни дүжүрер дээн бак чүүлдүң чедип кээрин өттүр сөглеп каан. Ш. Ондар).

380. Чер шимчээшкиннери эвээш болган бе? Шуурганнар, корабльдерниң далайже дүшкени, хемчээл чок изиг болгаш сооктар эвээш болган бе? Оттуг крест дээрге көзүлбээн бе? Чырык хүндүс сылдыс дээрге чайнаваан бе? Оттуг челээш дээрге хыппаан бе? Көвүдеп-ле турар демдектер эвээш болган бе? Корум-чурум чок байдал үезинде кижи төрелгетен бо болуушкуннарны билир хөңнү чок! Кажан кижилерниң чигзинии оларның караан дуглап турда, көскү демдектерни көрүңер деп албадавас Бис. Ынчалза-даа согур, дүлей кижилер аразында оттуң ажы-төлү бар, оларже Чырыктың келгенин билип алзыннар дээш, демдектерни чорудуп турар Бис. (Ол үеде социализм тургузуп тургаш, совет удуртукчулар үеннеп турда, капиталистиг чурттар социализм тургузуунга удурланып, ону дүжүрер дээш хөделип турда, база чамдык чурттарга чаа-дайын болуп турда, Бурганнар аңаа таарзынмайн, демдектер берип турган хевирлиг. Ш. Ондар).

390. Идегелди чок дээр кижилер дыка мелегей! Дайын күзээр кижилерниң карактары согур! Планетаның культура-биле чаартынып, эде тургустуна бээрин көрүп болур медерелдер дыка эвээш! Дээди хемчеглер-биле кылыр чогаадыкчы, тургузукчу ажылды медереп билбес кижилер эрги-ле дүвүрээзиннери-биле чок апаарлар. Чаа оруктарны медереп билбээн кижилерге Майтреяның (Майдырның) Үезин билири негеттинип турар! Тайбыңның болгаш Баштыңчы Бурганнарның Тугу ажык оруктарны бээр!

Эки, багай амыдырал дугайында

391. Карма хоойлузунга чигзинип чоруур кижилер силерге чедип келгеш, айтырар: «Ажык чок багай кижилер чедимчелиг, аас-кежиктиг, а төлептиг кижилер хилинчектенип чоруур, ындыг болуп болур чүве бе?» Аңаа мынча деп харыылаңар: «Чер кырының чедимчелиг, аас-кежиктиин соксадып шыдавас кижилерниң кармазы аар-берге болур, чүге дээрге мынча дээн: чедимчелии, аас-кежиктии дээрге – сүлдениң хөөрү-дүр». Оон аңгыда, чер кырының чедимчелиг, аас-кежиктии сүлдениң кулаан бөөшкүннеп турар. Хөй-ле кижилер чедимчелиг, эки чурттап чоруур кылдыр көзүлзе-даа, дыка аас-кежик чок чурттап чоруурлар. Ынчангаш, мону билир кижилерден кым-даа чедимчениң, аас-кежиктиң хемчеглерин кылбас. Чер адааның агымнарын бодавайн, шыпшыктар-биле хемчээр херек.

395. Кижи төрелгетен тургузуп каан Боттуг Амыдыралды медереп билбейн, эргиниң артынчыларындан, эрги угаап-бодаашкыннардан үнмейн турар. Хосталып турар чоннарның сүлдези ийи арынныг чорук, бүдүүлүк сүзүк ышкаш эрги энергияларда чүгле имистелип хып турар. Ооң үндезин чылдагааны – коргунчуг чүүлдер тарып турар церковь, ону ынчап болбас! (Шамбаланың Башкылары христиан хүрээ — церковька хөңнү чок. Ш. Ондар). Өскерликчи чорук хемчеглери-биле ажылдап турар күрүне туруп шыдавас. Сүлде, сагыш-сеткил чаартылгазы бо планетаны шыва ап турар коргунчуг чүүлдерни чок кылыр ужурлуг. Ынчангаш, чүгле Иерархияның илчирбе-дизии катап кижизиг овур-хевирже киирип болур. Мөңге Иерархияның дузазы-биле чаа тургузуг шак ынчаар тургустунуп турар.

397. Көңгүс анаа, бөдүүн кижи безин угаанның тускай баларгай байдалының үезинде (транс үезинде) авааңгыр, дидим, могап-турбас апаар болгаш аңаа билдинмес хөй чүүлдерни билип эгелээр болгаш көзүлбес делегейни эскерип, билип эгелээр, чүге дээрге, ол түр када куду, физиктиг делегейден адырлы берген. А кажан эглип келгеш, дээди бүдүжүн чидириптер. Медерелин чидирбес дээш болгаш дээди делегей-биле байлакшып алыр дээш, көвүрүгнү тып алыр херек. Ынчангаш, Агни Йоганы кижилерге дээди делегейни билип, харылзаа тутсун дээш, берген. <…>

399. Кажан чаа расаны чыып турда, ооң чыыкчызы – Иерарх. Кажан кижи төрелгетенге чаа чаданы тудуп турда, ооң Тудугжузу – Иерарх. Кажан чуртталганың ритминге Октаргай Сорунзазының айытканы чаданы тудуп турда, ооң бажынга база Иерарх турар. Үндезин-үрезининде Иерарх чок кандыг-даа болуушкун чок. Чада кайы хире күчү-күштүг болдур, Иерарх ол хире күчү-күштүг!

400. Дириг амытаннар делегейи үнүштер делегейинге көөрде, чиик дуржулгалар бээр. <…> Дириг амытаннарга кижиниң салдарлыын билип болур. Хорадааны, кортканы, бүзүрелдии, шиитпирлии оларже дамчыттынып турарын көрүп болур.

Куду кылдыр көөрүнүң хоразы

403. Башкының Айтыышкынында кандыг-бир кудулаткан чүүл барын айтып шыдаар силер бе? Чок, шыдавас силер, чүге дээрге, оон башка Башкы бо атка төлеп чок болур ийик. <…> Кудуладыыры дээрге сандараашкын, а бедидери дээрге хөгжүлде. Бис хөгжүлдеге бараан болуп турар бис. Айтыышкыннар, сагындырыглар, харын-даа килеңни көрүп болур, а кудуладыыры Бистиң ажыл-херээвисте чок. Бистиң удурланыкчыларывыс безин кудулаттырбаан, куду көрдүрбээн. Ийи хевирниң кижилери бар – чамдыктары бичии элдээртигни безин өндүр улуг кылып алыр, өскелери кайгамчык чараш чүүлдү безин хевир чок, чүдек кылып каар. Кижи бүрүзү бодунуң медерелиниң шаа-биле чугаалаар, ялалаар. Бир кижи чүрээ-биле улуг, а өскези дырыжа кадып калган мөөгү дег чүректиг. Ажыглаарының мурнунда, ону шыгыдар херек. Ылап-ла, бүгү частырыгларны эдер херек. Бо хоойлуну сактып алыңар. (Чүнү-даа багай кылдыр, куду кылдыр азы куду көрүп чорбас болза эки. Ол кижиниң амыдыралынга багай салдар чедирип болур. Дөмей чүве дөмей чүве тыртар дээр. Бичии экини-даа улуг эки кылдыр көрүп чорза дээре. Тывавыстың сайзыралының бичиилеп экижип олурганын көрбейн турган, харын-даа ону дедир сандарап турар дээр, хамык чүве бактаар, чүгле багай талазын касканнаар, ооң-биле чурттап чоруур кижилерни бис билир бис. Оозу-биле боттарын шала тудуу кижилер кылдыр улус-чонга көргүзүп чоруурун билбестер. Оларның медерелиниң шаа-ла ол. Интернет четкизинде Тываны, ооң даргаларын бактаар группалар турган, ам-даа бар чадавас. Оларның тургузукчулары кандыг кижилерил деп чүве билдиңгир ышкажыл. Тывазының адын бүгү делегейге баксырадып чоруурлар. Хоп-меге тарадып, «аксы-биле аал көжүрүп, дылы-биле дыт ужурбайн», боттуг ажыл-херектер-биле дузалаар херек.  «Шойгунуң чуртунда» деп группа хоп-мегезин салып, бактап-ла эгелээр. Шойгунуң адын баксырадыыр дээш, группазын ынчаар адап алган бе? Ш. Ондар).           

411. Кажан делегей, чок дээриниң, хүлээп көрбезиниң караңгызынче дүннү бергенде, ажыы чок эрги үндезиннерниң буступ, чок болу бээрин манап болур, оон башка делегейни канчап өскертип, чаартырыл? Бүгү ажыы чок үндезиннерниң өскерилгелери чокта, кижи төрелгетен канчап оттуурул? Чүгле кажан Иерархияның тургузуп кааны чаа, өндүр улуг принциптерин кижи төрелгетен медереп биле бээрге, ынчан кижи төрелгетенни камгалап болур.  Шак ынчаар Бис планетаны Чаагай Чоруктуң Иерархиязынче күжениишкинниг углап турар Бис. Чиде берген дээди билиишкиннер катап тургустунар ужурлуг, чүге дээрге, чиде берген принцип бүрүзү октаргайның үндезин өскерилгелерин болдурар. Кижи төрелгетенни ынчаар Иерархия принциви-биле катап сайзырадып, чаартыр херек.           

417. Сүлде бүрүзү бодунуң кармазын тургузар. Чон бүрүзү база бодунуң кармазын тургузар. Чоннар башкарыкчыларын дилеп турар болбайн аан, чүге дээрге шын эвес бодап турар кижилерни амгы башкарыкчызының тургустунган алдар-ады-даа тудуп шыдавас. Алдын-даа, ыыткыр, билдингир аттар-даа, хөй хүлээп алдынмас сүмелер-даа чонну камгалап шыдавас. Ылап-ла, оттуг бодал, Башкарыкчының оттуг сүлдези чаа оруктарны бээр, ынчангаш, октаргай өскерлиишкиннериниң үезинде Сагыш-Сеткил Башкарыкчызының сылдызы чидии-биле хып турзун. Ынчаар эрги делегейниң бузундуларынга Чырыктың Улуг Күрүнези тургустунзун!           

Тыртыжыышкын ынчаар улуг күчү-күш апарган. Шак ынчаар баш бурунгаар көрүп каан өндүр улуг Чаа Делегей дүжүп келген, ынчангаш Иерархияга удур кижилер качыгдаар!

Аарыглар дугайында

            418. Аарыглар: ыдыктыг аарыглар, карма аарыглары болгаш кижиниң бодунуң киирип алганы аарыглар деп аңгыланыыр. Баштайгы ийизи билдингир, чогум-на бо «Иерархия» деп номга, киирип алганы аарыглар дугайын сагындырып, чугаалаар болза эки. Кым азы чүү бо аарыгларны киирип турарыл? Билиг чок, мелегей чорук болгаш медереп билбезиниң коргунчуу болбайн аан. Аарыглар дугайын бодавазы эвээш болур, бичии уруглар оларны бодавас болгай, ол хирезинде аарый бээр. Медерелинге камгаланыыр болгаш нерв херелдениишкиннериниң чүве өтпес куяк-камгалалын тургузар херек. Бир эвес чон медерелдиг болза, улуг эпидемиялар безин өөскүп шыдавас. Кижилер боттарында кайы хире күчүлүг халдавырга удур эм (антисептика) ап чоруурун психиктиг энергияның бүдүмели-биле дуржулга көргүзүптер ийик. Маңаа ийи байдал херек. Бирээде – психиктиг энергияны бар деп медереп билири; ийиде – психиктиг энергия алыр чаңгыс орук — Иерархия деп чүвени медереп билири. Иерархияны чүге-даа хамаарышпас аңгы чүве деп көрүп болбас. Ол дээрге эң күштүг амыдырал берикчизи деп чүвени быжыы-биле шиңгээдип алыр херек. Бисте ону бир дугаар экиртиир эм деп адаар. Эм бүрүзүн ижер, мазь бүрүзүн чаар болгай. Анаа аптарада шыгжап каан чыдар эм экиртпес, ынчангаш Иерархияның магалыг чаагай хайыразын олче чүткүл-биле алыр ужурлуг. Чүгле өскертинмес чүткүл эмнээр уржукту бээр.           

420. Угаан чырыышкыны! Бо чаданы канчап чедип алырыл? Иерархияның соондан чорбайн, Ылап Шынның Үндезин-Дөзүнче чүнүң-биле кирерил? Угаан чырыышкынын чүгле Чырыктың үнген дөзүнден ап болур. Башкарыкчы херелди Иерархиядан өске кайыын тып алыр деп? Кижи төрелгетен бодунуң күчү-күжүн бодундан эвес, а өндүр улуг Иерархиядан ап чораан. Кижини чүгле Иерархияның дээди күчү-күжү-биле углап башкарып болур. Кижиниң угаан чырыышкыны дээрге дээди Иерархияның оруунче чорууру-дур. Ылап Шынны дилеп чоруур кижилер боттуг чүүлдүң утказын чүгле Иерархияже үнер оруктан тып ап болур. Оон башка чуртталга берге, билдинмес айтырыг болуп артып каар болгаш сүлде хөй чүс чылдар иштинде хосталыышкынны тыппас. Ынчангаш, Иерархия хоойлузу башкарыкчы Үндезин-Дөс-түр.           

422. Бир эвес силерге бодун хайыралавас, өөрүп, магадаан бодал аураны өскертиптер болгаш харын-даа эгин кырынга херелдер тывылдырыптары билдингир болза, делегейниң өндүр улуг чажыттарының бирээзин билир болганыңар ол. Бир эвес ажынып, хорадаары организмге империл деп хоран тывылдырар болза, бедик чаагай бодал бүрүзү кайгамчык чаагай, эки бүдүмел тургузар ужурлуг – ол ылап-ла ындыг. Ол ылап бар чүүл. Ол чүрек-дамыр системазынга тыптыыр болгаш мээ бүдүмелинге эки салдарлыг. <…>           

427. Идегелин шуут ышкынары дээрге бүзүрелин чидирери. Бүзүрел дээрге  билиг-дир, ынчангаш бүзүрелин чидирери – билиин чидирери-дир, бүгү чыып алган үүжезин чидирери. Идегелин ышкынары үнери берге байдал-биле тудуш. Кара күштерниң үргүлчү ажыглаар аргазы – сүрген кижизин берге байдалче киирипкеш, аңаа кем-херек үүлгеттирери. Бир эвес когараан кижи үстүнче орукту билбес болза, кайыын дуза дилээрил? Иерархияның ачы-буянын билип алган кижилерге үнер арга чок берге байдал болгаш бүзүрелин шуут ышкынар деп чүве турбас. Ынчангаш Өөредиг үстүнче көрүп билир кижи бүрүзүнге кайы хире дорт ажык-дуза чедирип болурунуң дугайында чугаалап турар.

Иерархия-биле харылзаа

            428. Бүзүрелдиг Иерархия-биле харылзаа тудуп өөренип алыр херек. Иерархия-биле хора чок болгаш чайгылыш чок харылзаа кайы хире күчү-күштү бээр ийик! Ынчалза-даа чайгылчак чигзиниглер чүрек согуундан кыска-даа болза, медерелди шаптып болур. Иерархия-биле үргүлчү харылзаа тударынга бодун өөредир херек, чүрекке чүгле ынчаар чуртталганың уязы туттунар.

429. Чер кырында чуртталганы Иерархия чокка чурттап болбас. (Чер кырында чуртталганы Бурганнар чокка чурттап болбас дээн. Оларны хүндүлеп,  чалбарыглар, өргүлдер кылып, харылзажып чоруур болза, олар кижиге дузалап, чедиишкиннер берип, камгалап чоруур. Кижиге кара моондактар турбас, чорук-херээ аайлажып, чогуп чоруур, амыдыралы чиик, аас-кежиктиг болур. Ындыг-даа болза эрткен чуртталгазында ажылдап алганы кармазындан база хамааржыр. Кижи багай кармазын эдилеп, эдер ужурлуг. Бурганнар кижиниң кармазынга киришпес, ооң хостуг эргезинге база дегбес. Кижи канчаар чурттаарын, чүнү кылырын чүгле боду билир. Ш. Ондар). Ындыг-даа болза, ылгал бар – кандыг иерархияны медерел шилип алырыл? Буурап, сандарааш, алдын иерархиязынга болгаш харын-даа идээледир чиириниң иерархиязынга чедип болур. (Кара күштерниң иерархиязынче кире берип болур. Ш. Ондар)

430. Кижилер бодун, бодунуң ажыын бодаары дыка улуг ужур уткалыг деп бодаарлар! Кижилер медерелинге билдинмес чүүлдерден дыка коргар! Кижилер Дээдиге коштунарындан дыка коргар болгаш караңгының кызыгаарынга артып каарын күзээрлер! Бир эвес сүлде Чаагай Чоруктуң Иерархиязынче чүткүүр болза, күзел бүрүзү эң-эки шиитпирже чоокшуладып турар. Бир эвес кижи Башкарган Холду болгаш Иерархияның Айтыышкын бүрүзүн хүлээп алыр болза, чада бүрүзүнче сайзырап үнүп болур. Төөгү чуртталганың Иерархиязы-биле тургустунар. Кижи төрелгетенниң эң-эки чадалары болгаш чедиишкиннери Иерархия-биле тургустунуп турган. Чүгле ынчаар Иерархия-биле чедип ап болур. Ынчаар өндүр улуг үе тургустунган болгаш делгемни улуг кыйгы-биле долдуруп турар Бис!

432. Кижи төрелгетен чүнүң-биле бодунуң кармазын камгалаар болгаш хөгжүлдеже бурунгаарлаар деп идегеп турарыл? Өндүр улуг үндезиннерни тооп көрбези-биле эвес-ле болгай; дээди принциптерни кудуладыыры-биле эвес-ле болгай; тургузуп каан Эге Үндезиннерни үрээри-биле эвес-ле болгай! Кижи төрелгетен өндүр улуг Иерархиядан аңгыланыыр болза, ону тамыже апаар деп чүвени бодавайн, бодунуң принциптерин үрегдээшкинче тударын уламчылавышаан. Боттарын сандарадып, үрээри -- караңгының бүгү бараан болукчуларының салымы. Кажан кижи төрелгетен караңгының тургусканы кызыгаарлаашкынче углаар болза, Дээди Чырыкче болгаш камгалалче орукту тыппас.

433. Өндүр улуг Башкарыкчы чокта, кандыг күрүне сайзырап турар-дыр? Кандыг тургузуп каан эгелээшкин Баштыңчы Бурган чокта чурттап туржук? Ылап-ла, Башкарыкчы дугайында билиишкинни бүгү дээди чүткүлдерниң түңү кылдыр билир херек. Чүгле ынчаар Чырык Башкарыкчының Иерархиязының дугайында билиишкин сүлдеге угланыышкынны бээр. Ынчангаш шупту, шупту, шупту боданзыннар, Иерархияның күчү-күжүн сактып алзыннар. Чүгле бо билип алыышкын-биле бурунгаарлап болур. Чүгле бо билиишкин-биле чүве чедип ап болур. Иерархияже октаан даш бүрүзү боттарынга удур улуг даг апаар деп чүвени сактып алзыннар. Шак ынчаар шупту билип алзыннар. Башкарыкчы-Иерархты ынчаар делгередип, чарлап тур Бис!

Дуза дугайында

434. Бот-боттарыңарга дузалажыңар, дыңнадыңар бе! Бичии-даа чүвеге, улуг-даа чүвеге дузалажыңар. Дуза дээрге келир үеже соктаары-дыр.  Хол кире бээр чер бүрүзүнге дузалаңар. Бодал чеде бээр чер бүрүзүнге. Шак ынчаар келир үеже соктаар бис. Бодувустан чарыгдаан шак бүрүзү келир үеге баар деп чүвени ынчаар билип алыр бис. Удазын туткан хол када бербес-ле болза, Бистиң-биле кады-ажылдажылга бүгү херек чүүлдерни эккээр деп чүвеге чаңчыгар херек. («Удазын туткан хол када бербес-ле болза» дээрге харылзааны үспес-ле болза дээн уткалыг. Ш. Ондар).

Дуза-биле хып турар чүрек – Бистиң чүрээвис. Билбес кижилерге  коргунчуг, билип алган кижилерге тергиин болур үеже ам кирип болур.

435. <…> Чон бүрүзү, чүнүң-даа мурнунда, мерген угаанныг Башкарыкчы дугайында сагыш салыр херек, чүге дээрге башкарыкчы чок хеме шуурганга удур туржуп шыдавас. Ынчангаш чоннуң болгаш тургузуг бүрүзүнүң улуг сагыш човаашкыны Иерархияга үндезилеттинген болур ужурлуг. Чүге дээрге тудуг бүрүзү Үстүнден күчү-күш алган турар ужурлуг. Кажан Иерархияны билип албаан шаанда, кижи төрелгетен чүве билбес мелегей чорукка болгаш үрегдээшкинниң караңгызынга дүжүп чоруур.

Кара күштер хөлчок оваарымчалыг апарган, чүге дээрге делегейге эде тургустунуушкун херегин болгаш делегей ону күштүү-биле дилеп турарын билип турар! Кара күштер бодунуң өлүмүн тургузуп турар.

436. Кандыг-бир кижи Иерархияны, кады-ажылдажылганы, дузаны чүрээниң энергиязы чокка чедип алыр мен деп бодавазын. <…>

 439. Даглар болгаш теректер коргуп-сүртеп болур бе? Болбайн канчаар, бир эвес оларның сүлдези кижиниң сайзыраңгай медерели-биле дегжи бээр болза. Хөл өөрүп, чечектер хөглеп болур бе? Болбайн канчаар, бир эвес олар көрүштен кадып каап болур болганда; Иерархияның адакы болгаш үстүкү бөлүктериниң аразында хамааржылгазы ындыг. Чүгле хөлчок сайзыраңгай сүлде хая-дашты бодунуң акы-дуңмазы кылдыр санап болур.

440. Кажан Бистиң-биле харылзажыыр деп сорулга салдынган болза, быжыг шиитпирлиг болур херек. Ынчалза-даа бичии-даа өскерликчи чорук санап четпес айыыл-халап, бергелер тургузуп болур. Кулактыг кижилерни сагындырып тур Мен.

444. Кажан кижилерниң четпестери күштүү-биле илереп кээрге, делгемниң оттары кедереп турар. Октаргайның чуртталга илерерээшкиннерин долдуруп турар от чаа мага-боттар хевирлээринче чүткүүр. Ындыг-даа болза кижи төрелгетенниң чуртталгазының кылдыныгларынга ол илеревейн баарга, Октаргайга болгаш кижиниң тургузугларынга үрелиишкин, буураашкын тургустунар. Октаргай боду от төптүг болуру дег, кижи төрелгетен база бодун башкарыкчы принцип-биле долдуруп турар Иерархияның от төвүн медереп билир ужурлуг. Оттуг Чүректиң дээди Иерархиязын билип алырынче ынчаар чүткүп болур.

Ынчаар кижи төрелгетен бүгү эң-эки угланыышкыннарны медереп билир ужурлуг, чүгле ынчаар хөгжүлдеже буруңгаарлап болур. Ылап-ла, чүгле Иерархияның соо-биле чорааш, буруңгаарлап болур. Ынчангаш өндүр улуг солчулга, халажылга үезинде кижи төрелгетенни чүгле Иерархияның дузазы-биле камгалап болур. Ынчангаш чоннарның Камгалакчызы кылдыр   Башкарыкчының өндүр улуун медереп билири чугула. Дүшкүүрлүг үе, кайгамчык үе! Шак ынчаар өндүр улуг келир үени тудуп, тургузар бис! (Социализм тургузарын чугаалап турар. Ш. Ондар)

445. <…> Кайда тиилелге, кайда аштырыышкын деп чүвени эвээш-ле кижилер аңгылап билир. Сагыш-сеткил сайзыралының өзүлдези караңгыны тиилээри-биле тудуш деп чүвени билир херек. Кажан Чырык үндезин өскерилгени тургузуп болур турда, караңгы хоозун-меге менди-чаагайны, меге аас-кежикти берип болур. Кижи бүрүзү кыска орукче чүткүүр, ындыг-даа болза кым эң-эки чедиишкиннерни бодап билирил? Чүгле Иерархия-биле харылзаа эң-эки оруктуң тускайын тайылбырлап болур. Бисте маадырлыг чорукту эң кыска орук деп санаар деп шиитпирлеттинген. Оларда кортпазын багай демдек деп санаар. Бисте кадыр оруктарны ойбас. Оларда дөъш бүрүзүн херекчок күш чарыгдалы дээр. <…> Бис эрес-дидим шураашкын бүрүзүн билир Бис, оларга ол бодал чок, мелегей чорук болур. Ынчаар мерген угаанның эрес-дидими-биле өскерликчи чоруктуң бодал чогунуң аразында чүгле чүрек чыдып турар. Ол -- Иерархияның Хаалгазын камгалап турар болгаш ажыдып турар. Бодунуң чүрээнден Башкының чүрээнче шөйген мөңгүн удазын-биле чоруп олурар кижи эвээш частырыг кылыр.

Бурганнар Иерархиязының ачызы

447. <…> Кижи төрелгетен дыка хөй кайгамчык чүүлдерни үреп каан, чүге дээрге башкарылганы хүлээп албаан. Ынчангаш башкарылганың өндүр улуун медереп билбейн, кым-даа чедиишкин чедип ап шыдавас. (Социализм тургузуушкунунуң эгезинде  мелегей совет удуртукчулар Буррганнарның башкарылгазын хүлээп албаан болгай. Ш. Ондар) <…>

449. Чүректи көстүүр делегей биле көзүлбес делегейниң харылзаазы кылдыр билип алзыннар. <...>

450. <…> Бир эвес Иерархиже чокшулавас болза, кижи төрелгетен делгемниң оттарынче канчап чоокшулаарыл! Иерархияның башкарыкчы принциви кижи төрелгетенни ынчаар чаа буруңгаарлаашкынче чалбыыштыы-биле углап турар. Бо күчүлүг буруңгаарлаашкын чокта, планетаны караңгы дуглаптар.

451. Бир эвес Йоганың байдалдарын, утказын, сорулгазын чугаалаар болза, аңаа каттыжар кижилер көңгүс эвээш болур ийик. Кажан Йог чегей-даа, элбекшилдиг-даа тургаш, бодун чаңгыс-аай ап чорда; кажан ол эт-септиң чүгле башкарыкчызы кылдыр бодун санап чорда, кажан Йог Дээди күштер-биле харылзааны байырлал деп болгаш бодунуң сорулгазын Делегейге ажык-дуза кадар деп билип чорда, бодунуң ажыын   бодаар чоруктан ойталаары кижилерге коргунчуг болур. Бодун долгандыр турар хүрээлеңниң четпестериниң кадыг-берге амыдырал байдалын хүлээп алыры хөй-ле эвес кижилерге тааржыр. <…>

460. <…> Сатиа Юганың база бир чадазы эгелээн Өндүр Улуг Хүнде бижиирин доозуп каалыңар. Өөрү үнериниң чадазын шагда-ла бижимелдер баш удур айыткап турган, ынчалза-даа кижилерниң караан базаарның доозуну дуглап турган. Ам безин айтырарлар: «Труба үнү кайыл? Ангелдерниң чалгыннары кайыл? Даглар болгаш далайларның девидээшкини кайыл?» Согур кижилер шуурганны чем чииринче кыйгы деп бодап турарлар!

<…> Шын орукту билип алган кижилерге Өөредиг ажыттынып кээр. Медээчи оларның эжиин соктап кээр.

(«Иерархия» деп Өөредиг мооң-биле доозулган. Бурганнар Иерархиязы кижилерниң амыдырал-чуртталгазынга кайы хире салдарлыг деп чүвени көрдүвүс. Кижи төрелгетенниң амыдыралынга кандыг-даа эки болуушкун, кандыг-даа эки эгелээшкин, кандыг-даа сайзырал чүгле Бурганнарның ачызы-биле болуп турар. Амгы үениң Башкарыкчы Улуг Бурганы Майтреяга (Майдырга) чүдүп-сүзүглеп, Ооң-биле харылзаа тудуп чоруур болза, кижиге кайы хире дузалыг деп чүвени билген боор силер.

Бүгү-ле чүвени Үстүү Делегейден бодарадып, чаяап, углап, баштап турарын база билген боор силер. Шамбаланың Бурган Башкыларының Е. П. Блаватскаяга бижидип кааны «Тайная доктрина» деп номунда кижиниң шупту кылган эки-даа, багай-даа чүүлдери үстүү делегейде Акашада таңмаланып, бижиттинип турар, ооң түңнели-биле, кижи чок апаарга, липиктер деп Карма Бурганнары, бир эвес кижи кижи кылдыр катап төрүттүнер дээн болза, кижиниң келир чуртталгазында кармазын ооң-биле тодарадып турар дээн. Ооң кадында, кижи ээн арыг иштинге кым-даа көрбейн турар дээш, эдээн ажып болбас, шупту көрүп турар дээн. Кайы хире-дир? Көзүлбес делегейниң чурттакчылары, Бурганнары, өске-даа амытаннары бистиң канчаар чурттап, чүнү канчап турарывысты өттүр көрүп турар ышкажыл. А бистер, кижилер, бо бүгүнү билбес бис.

Элээн болгаш база бир өөредигден салыр чадавас боор мен. Силер бүгүдеге бүгү-ле экини күзедим! Ш. Ондар). 

 .

 .