Майдыр Бурганнын чуртталгага ооредии

Экии, хүндүлүг номчукчулар! Мен Майдыр (Майтрея) Бурганның "Агни Йога" деп өөредиин тыва дылче очулдуруп каан мен. Эртем-шинчилел институдундан очулганы эки деп үнелелди бижип берген. Ону ам чүгле ном кылдыр үндүрери арткан. Номну "Майдыр Бурганның чуртталгага өөредии" деп адаан мен. Чүге дээрге өөредигни "Чуртталгага өөредиг", "Ёзулуг этика" деп база адап турар. Ам ооң эге киирилде сөзүн силерге таныштырайн. 

Бис чүгле көстүүр делегейниң материалистиг эртемнерин өөренип турар бис. Олардан аңгыда көзүлбес делегейниң эртеми база бар. Ол Бурганнар өөредиглери болур. Бис көстүүр болгаш көзүлбес ийи делегейде хары угда чурттап чоруур бис. Ынчангаш ийи делегейниң эртемнерин билген турар ужурлуг бис. Ынчан долу эртемниг болуп, медереливис делгемчий бээр. Чүгле чаңгыс материалистиг эртем өөренир болзувусса, чартык угаанныг, тудуу кижилер болур бис. "Материалистиг эртем кижилерниң ылап шынны билип алырынга шаптыктап турар, тудуу эртем-дир" - деп, Майдыр Бурган өөредиинде ынча дээн.

Бо номда бижээн киирилде сөзүмден кижи төрелгетенниң тывылганының, ооң сайзыралының дугайында база Бурганнар деп кымнарыл деп чүвени билип алыр силер. Бо киирилде сөстү чүге салып турарың ол дээрге, силерге ылап шын билиг бээр дээш ынчап турар мен. Мында билиг долузу-биле кайда-даа чок, мен ону чыып, тургузуп каан мен.  

Ам номнуң эгезин көрээлиңер. Допчузунда өөредиглерниң аттары.

   Майдыр Бурганның чуртталгага өөредиии

Допчузу

1. Эге киирилде сөс

2. Морианың сесерлииниң бүрүлери

3. Община

4. Агни Йога

5. Кызыгаар Чок Делгем

6. Иерархия

7. Чүрек

8. Оттуг Делегей

9. Аум

10. Акы-Дуңмалышкы ёзу

11. Үстүү Делегей

12. Түңнел сөс

Эге киирилде сөс

Экии, эргим тыва чонум! Будда Шакьямуни Бурган-Башкының соонда Чер кырынга чаларап келир деп баш удур чугаалап кааны, манап турарывыс Майтрея Бурганның, азы тывалап чугаалаарга, Майдыр Бурганның 16 томнуг Өөредиин номчааш, ооң дугайын тыва чонум силерге тайылбырлап, таныштырар күзел меңээ оттуп келген. Ооң Өөредиглери 1924-1938 чылдарда аңгы-аңгы номнар кылдыр үнүп турган. Ындыг өртээ чок үнелиг эртинени чүгле чааскаан номчуп, билип алыр эвес мен, ооң дугайында өске кижилер база билип алзыннар деп бодаан күзелим чүве, ындыг-даа болза ону билир, номчаан кижилер бар болуп чадавас.

Өөредигни долузу-биле очулдурар сорулга салбаан мен. Чамдык черлерни ушта бижип, тайылбырлап, ниити таныштырар бодаан мен. Ынчалза-даа чем чиир хөөн чем чип олурар үеде кирип келир дээни ышкаш, ушта бижиир черлер көвүдеп, мени туттундурбайн барган болгаш бижимелдиң хемчээли улгады берген, 800 хире саазын арны болган. Ол дээрге хөлчок кылын ном-дур. Кым билир боор, ындыг болур ужурлуг турган-даа болуп чадавас.

Бо ном Майдыр Бурганның долу өөредии эвес, а оон аралай ушта бижигилээн бичии кезээ болгаш мээң тайылбырларым кирген таныштырылга-дыр деп чүвени сагындырып каайн. Сөөлүнде өөредигни долузу-биле очулдуруптар кижи тыпты бээр боор деп идегээр мен.

Эгезинде Өөредигде кирбейн турар кыска тайылбырдан кылыптайн. Ол Өөредигни билип алырынга дузалаар чадавас. Олар дараазында эгелерде. Ол тайылбыр амгы үеде хүлээп көрдүнүп турар көрүштен ылгалдыг, чүге дээрге көзүлбес делегейниң эртеминге үндезилээн. Ол эртемни Бурганнар тургускан болгай, а ылап шын оларда.

Октаргайның «тудугжулары»

Октаргай чурттакчыларлыг. Планеталар, сылдыстар бот-боттары аразында харылзаалыг, ынчангаш Октаргай бот-боттары-биле тудуш делегейлерден тургустунган. Бо бүгүнү Октаргайның чаяакчы, тургузукчу Чырык Күштериниң Иерархиязы удуртуп, башкарып турар. Ол Иерархия янзы-бүрү деңнелдиг, күштүг Иерархтардан азы Удуртукчулардан тургустунган.            

Октаргайның кол хоойлузунуң принциви — адаандаазы үстүкүзүнге эки-тура-биле чагыртыры. Ол принцип Өртемчейниң кол үндезини, ол мөңге болгаш хажыттынмас. Ол хоойлу-биле Октаргайның Чырык Күштериниң Иерархиязы тургустунган. Планета бүрүзү бо Иерархиядан Удуртукчулуг болур. Бистиң Чер деп планетаны Люцифер деп Удуртукчу удуртуп турган.           

Бо Иерархияда Удуртукчуларны Өндүр Дээди Кижилер, Махатмалар, Кумарлар, Дхьяан-Коханнар, Бурганнар деп адаар. Чоннар янзы-бүрү адаар хевирлиг. Олар хөй Манвантараларны эрткен, планеталарга чурттап чорааш, дээди сайзыралды алган, Бурган апарган кижилер болур. Кижи болуп чорбаан Бурган чок дээн. Кым ынча дээнил деп чамдык кижилер айтыра бээр боор чораан. Шамбаланың Бурган-Башкыларының Е. П. Блаватскаяга бижидип кааны «Тайная доктрина» деп номунда ынчаар бижип каан. Ол Бурганнарны Октаргайның «тудугжулары» дээр, чүге дээрге Пралайялар соонда, Октаргайның чаяакчы энергиялары-биле планеталарга амыдыралды катап тургузуп, шупту чүвени чаяап, бүдүрүп, углап, баштап турарлар.            

Өртемчейниң база бир кол хоойлузу — Пралайя, Манвантара хоойлузу. Пралайя дээрге Октаргайга азы кандыг-бир планетага амыдыралдың чиде берип, туруптары. Манвантара — амыдыралдың катап тыптып кээп, хайны бээри. Пралайя, Манвантара миллиард чылдар иштинде үргүлчүлээр. Олар анаа амыдыралда база болуп турар: дүн-хүн, удууру-оттууру, чай-кыш, амытаннарның өлүп-төрүттүнери. Хөгжүлдениң оожумнаары, күштелири, чүрек согуушкуну, янзы-бүрү ритмнер. Аштырыышкыннар, чедиишкиннер база бо хоойлуга үндезилеттинген. Кижи доктаамал тиилеп турбас болуп болур, аштырыышкыннар болуп болур. Чижээ: кандыг-бир спорт маргылдаазынга кижиниң эки ритми таваржы бээр болза, ол чииги-биле тиилеп алыр. Ону «кижиниң хүнү кирген» - дээр. Ынчангаш кижи Октаргай хоойлуларын билир болза, мерген угаанныг болур. А Октаргай хоойлулары Бурганнар өөредиглеринде, а Бурганнар өөредиглери шажын өөредиглеринде. Чедиишкин чедип алырынга бодунуң хирленмээн чырык энергиязы, Дээди Күштер база дузалап болур.

Кижи төрелгетенниң Черге тывылганы

            Материалистиг эртем ёзугаар, кижилер Чер кырынга 1 миллион чылдар буруңгаар тыптып келген деп турар. Чарльз Дарвинниң теориязы-биле, ол үе иштинде кижилер сарбашкындан амгы үеге чедир сайзырап келген деп турар. Чамдык эртемденнерниң бодалы-биле, сарбашкындан кижиге чедир сайзыраары 1 миллион чылдар эвээш деп турар. Чоокку үелерде эртемденнер 4-5 миллион чылдар болган кижи сөөктерин ол-бо черлерден тыпкан болуп турар.   

Ам көзүлбес делегейниң эртеминиң азы Бурганнар  өөредииниң тайылбырын көрээлиңер. Кижилер Чер кырынга боттары иштинде 7 расалыг 7 расаны чурттап эртер ужурлуг. Раса дээрге ниити кижи төрелгетенниң салгалының хевири деп болур. Ол хевирлер боттарының иштинде база сөөк-язы-биле аңгыланып турар 7 расалыг болур. Черге амыдырал Айдан келген. Ай амыдыралын Черже дамчыдыпкаш, боду Пралайяже кирип, удуй берген. Ооң долганыры безин оожумнап калган.           

Черге баштай кижи төрелгетен тыптыырда бирги расаның кижилери каракка көзүлбес болуп турганнар. Ийи дугаар расаның кижилери туман, ыш хевирлиг ышкаш көстүүр турган. Олар өлүм деп чүве билбес. Үш дугаар расаның кижилери 18 миллион чыл буруңгаар Лемурия дипке тывылгаш, чоорту көстүүр апарып, дыгый, эът-мага боттуг апарганнар. Олар баштай 18 метр узун кижилер турган, чоорту 6 метрге чедир чавызап бадып келгеннер. Олар улуг амытаннар-биле демисежир кончуг күштүг кижилер турганнар.            

Баштай лемурийжилерниң угааны шоолуг эвес, дириг амытаннар угаанынга дөмей чыгыы турган. Оларның сайзыралын дүргедедиир дээш, Октаргайның Чырык Иерархиязы Черже Венерадан, Юпитерден 7 Удуртукчу Бурганнарны чоруткан. Оларның дузазы-биле Лемурия чоорту бүгү тала-биле сайзырааш, бедик сайзыралды чедип алган. Лемурия хөй миллион чылдар иштинде чурттаан.            

Сөөлүнде лемурийжилерниң мөзү-бүдүжү баксырааш, чаа-дайын кылып, өлүржүп-чидиржип, Октаргай хоойлулары үрээнинден Лемурия далайже дүжүп кире берген. Амгы үеде ооң артынчызы деп болур Австралия, Цейлон, Пасха ортулуктары бар. Пасхада лемурийжилерниң боттары-биле дөмей улуг тураскаалдары артып калган. Амгы үеде лемурийжилерниң салгалдары негрлер болгаш кара сөөктүг чоннар болур.           

Ынчангаштың моон көөрге, кижи сарбашкындан тывылбаан, харын сарбашкын кижиден тывылган деп турар.           

Кижи төрелгетенниң 4 дугаар расазы лемурийжилерниң соонда, 4-5 миллион чыл буруңгаар Атлантида дипке тывылган деп турар. Баштай оларның дут-сыны 3,5 метр чедип турган, чоорту 2,5 метрге бадып келген. Оларның кежиниң өңү кара-кызыл, кара-хүрең турган.           

Атлантыларның бирги салгалдарының медерели шоолуг сайзыраңгай эвес турган. База-ла Бурган-Башкыларның удуртулгазы-биле миллион чылдар эрткен соонда, бүгү талалыг дыка бедик сайзыралды чедип алганнар. Харын-даа ужар «тавактар»-биле ужуп турганнар. Бодунуң күчүлүг психиктиг энергиязын ажыглап өөренип алганнар. Египеттиң пирамидаларын олар физиктиг күш ажыглавайн, анаа энергия күжү-биле тудуп кааннар. Атлантылар база-ла лемурийжилер ышкаш, хоойлулар үреп, мөзү-бүдүжү баксырааш, далайже дүжүп кире берген.           

Бис амгы үеде 5 дугаар раса бис, 6 дугаар раса чаа тыптып турар. Бисте база лемурийжилер биле атлантыларның чиде бергени ышкаш байдал тургустунарының кырында турар. Чүгле Бурган-Башкылар бистиң хир-бачыдывысты арыглап, ындыг байдал болу бээринден чайладып турар.           

Оон ыңай, кижи төрелгетен баштай тыптыырда, каракка көзүлбес сүлде-сүнезиннер тургаш, чоорту каракка көстүп турар дыгый мага-боттуг апарган болза, ооң сайзыралы доостурда, дыгый мага-боттан үнүп, база катап каракка көзүлбес сүлде-сүнезиннер апаар деп турар. Ол ам кижи сайзыралын доозуп, дээди сайзыралды апкаш, кижилер бурганнар апаарлары ол. Эң кысказы-биле тайылбырлаарга мындыг. Бир эвес минералдардан эгелээш, амыдыралдың Черге тывылганын тайылбырлаар болза, узай бээр.

Бурганнар деп кымнарыл?

Кижи төрелгетенниң 3 дугаар расазының үезинде кижилерниң сайзыралынга дузалажыыр дээш, Венерадан, Юпитерден Чырык Күштерниң Иерархиязындан 7 Бурганнар Чер кырынга келген деп үстүнде бижээн болгай мен. Олар баштай Лемурияга, ооң соонда Атлантидага, Египетке чурттап турганнар. Кажан бүгү делегейге үер болган соонда, Тибетте Гималай дагларында Шамбалага чурттай бергеннер. Амгы үеде Шамбаланы Майдыр Бурган удуртуп турар. Ындыг-даа болза амгы үеде Бурган-Башкыларның кол турар чери Тянь-Шяньда барган.

Шамбаланың Башкылары-биле катай Үстүү Делегейден Черге Черни башкарып турган Люцифер (Сатана) кады келген турган. Ол өске черге, Сатурнга турган болгаш, Башкылардан мөзүзү куду болган болгаш, Черни чааскаан чагырар мен дээш, Башкыларга удурланып, кара күштер чыып, үрегдекчи ажылын эгелээн. Ол Черни үстүкү планеталар харылзаазындан аңгылап каапкан турган, ынчангаш Чер сайзыралы-биле чыдып калган. Ону сөөлүнде «падший ангел» дээр апарган. Башкылар ынчаар кара күштер-биле демисежип эгелээннер. Ону «Шамбала дайыны» дээр.

Лемурийжилерниң-даа, атлантыларның-даа мөзүзүнүң баксырааны Сатананың, ооң кара күштериниң ажылы болур. Башкылар айыылдар болурунунуң мурнунда, Лемуриядан-даа, Атлантидадан-даа чырык, эки кижилерниң шуптузун айыыл чок черже өскээр көжүрүпкен турганнар. А арткан кара энергиялыг кижилерни Октаргай узуткаар ужурга таварышкан.

Атлантидага айыыл-халап үш катап болган. Сөөлгү катап 10 муң чыл буруңгаар болган. Ол Посейдонис деп ортулук чер шимчээшкининден далайже кире берген. Атлантиданың эки кижилерин Башкылар Египетче көжүрүпкен турган.

Шамбаланың Бурган-Башкыларын Махатмалар, Улуг Башкылар, Ак Акылар, кижи төрелгетенниң Улуг Акылары, Мерген Угаанның Башкылары деп база адап турар. Олар кижилер шын орук-биле мөзү-бүдүштүг сайзыразыннар дээш, раса бүрүзүнге-ле Октаргай хоойлулары өөреткен Өөредиглерин чорудуп турганнар. Ындыг өөредиглерни Шамбаланың Башкызы Мориа (Мориа -- амгы Баштыңчы Майдыр Бурганның чогум ады) Рама, Гермес, Кришна, Будда, Моисей суглар болуп төрүттүнүп чорааш, берип турган. Ол Иисус Христос болуп база чораан болгаш өске-даа угаанныг кижилер болуп төрүттүнүп чораан. Чижелээрге, Пифагор болгаш өскелер-даа. Шамбаланың Бурган-Башкылары эртемденнер болуп төрүттүнүп, ажыдыышкыннарны кылып, өске-даа угаанныг кижилер, хааннар болуп төрүттүнүп, чоннарны эки, шын орукче баштап чорааннар. Олар Ориген, Парацельс, Лао Цзы, Джордано Бруно, Платон, Сен-Жермен, Акбар дээш, адаар болза эңдерик. Амгы Майдыр Бурган болуп чоруур Мориа Башкы орус чуртунуң ламазы Сергий Радонежский болуп база чораан. Ол Россияның дайыннарга тиилээринге үш катап дузалаан болуп турар. Шамбаладан бир Башкы Жанна д Арк болуп чораан.

Шамбаланың Башкылары чурттар баштыңчыларынга оларның берге үелеринде арга-сүмелерни берип чоруурлар. Оларны дыңнаан удуртукчулар эки түңнелдерни чедип ап турганнар. Оларны Американың баштыңчылары чораан Джорж Вашингтон болгаш Франклин Рузвельт дыңнап чорааннар.  

Францияның хааны Людовик ХVI граф Сен-Жерменниң сүмезин хүлээп албаан. Түңнелинде хаан биле кадын шаажылаткан, чазакка Наполеон келгеш, Европага, ооң иштинде Францияга база дыка улуг когаралды чедирген.

ХХ вектиң 30 чылдарында Европага болгаш Америкага экономикага сандараашкын эгелээн. Американың президентизи Рузвельтге өндүр Башкылар Е. И. Рерихти таварыштыр сүмелер чоруткан, ол оларны хүлээп алгаш, экономиканы сандаралдан камгалап алган.

1926 чылда Башкылар ССРЭ-ниң удуртукчуларынга Николай болгаш Елена Рерихтерни таварыштыр социализмни канчаар тургузарынга хамаарышкан сүмелер чоруткан. База социализм тургузарынга дузалажыр Бис - дээн турган. Олар ону хүлээп албааннар, харын-даа Рерихтерни тудуп, бажыңнап алыр часканнар.

Совет удуртукчулар Бурганнарның сүмелерин хүлээп албайн, дыка улуг частырыгларны кылганнар. Оларның билиг чок, караңгы мелегейи социализмге-даа, чонга-даа удур улуг кем-херек үүлгедиишкинин болдурган. Сталинниң ханныг, кара-туразында башкарылгазы, күш-биле коллективизация, шору балдырлыг тараачыннарны, интеллигенцияны, буруу чок кижилерни истеп-сүрүп, чок кылганы. Башкыларның сүмезин эдерип, оларның дузазы-биле социализм тургускан турган болза, көңгүс өске социализм турар ийик, ол дүшпес-даа турган. Кижилер ынчаар аксының-кежиин кузуп алганнар. Социализмниң дүшкени база кара күштерниң ажылы болур.

Шамбаланың Башкыларының кара күштер-биле дайыны колдуунда Көзүлбес Делегейге болуп турган. Ол чер кырында база болуп турар. Ооң бир чижээ — ийиги делегей дайыны. Аңаа чырык күштүг ССРЭ тиилээн. Ам-даа кара күштер-биле дайын уламчылавышаан. Украинада тускай операция база аңаа хамааржыр.

Шамбаланың Бурган-Башкылары кижи төрелгетенниң сайзыралын башкарып чоруурлар. Ниитилел тургузуун буруңгаар сайзырадыр дээш, социализмни олар тургускан. Ол дээрге Октаргайның Чырык Күштериниң Иерархиязының баш удур көрүп каан планы болур. 

Эртем-техникага, экономикага бүгү талалыг сайзырал, бүгү чүве Октаргайдан болгаш Шамбаладан кээп турар. Ол дугайын Өөредигни номчааш, биле бээр силер.

 «Агни Йога» өөредиин кым бижээнил?

Үстүү орандан келген Бурганнар чурттап турар Шамбала чажыт, тывызыксыг чер болуп турар. Ынаар кым-даа кирип шыдавас, чүгле Бурган- Башкыларның боттарының кыйгыртканы арыг, төлептиг кижилер кирип болур. Чүс чыл иштинде чүгле бир-ийи кижилер кирер. Ынаар кирген кижилер Шамбала дугайында кымга-даа чугаалавас турган. А Шамбала чоогунуң чурттакчылары ону билир, өске кижилерге база чугаалавас.

Кижилер чүгле материализм эртеми өөренип, чүгле каракка көстүр чүүлдерге бүзүрээр, көзүлбес делегей чок дээр, Бурганнар чок дээр, көзүлбес делегейниң амытаннары, чурттакчылары чок дээр, Октаргайда амыдыралды, ооң чурттакчыларын билбес -- мындыг мелегей чорук Бурган-Башкыларны дүвүредип чораан.

Ынчангаш бо дугайында чүнү-даа билбес Барыын Чүк чоннарынга бо бүгүнү өөредир бодааннар. А Чөөн Чүк чоннары оларга бодаарга, билиглиг, сүзүктүг. Бир дугаарында, Башкылар Елена Петровна Блаватскаяга  өөредиглиг «Разоблаченная Изида», «Тайная доктрина» дээш өске-даа номнарны бижиткен.

Е. П. Блаватская Индияга, Тибетке, Шамбалага чораан. Башкылардан өөредиг ап, оларның дузазы-биле Барыын чурттарга Башкыларның өөредиглеринге үндезилээн теософия өөредиглерин өөренир бөлгүмнер, ниитилелдер тургузуп, чырыдыышкын ажылын кылып чораан. Бир-ле дугаарында, Шамбала деп черде Бурган-Башкылар чурттап турар деп кижилерге таныштырган. Башкылар боттары теософия бөлгүмнериниң чамдык кежигүннери-биле ужуражып, олар-биле чагаалажып турган.

Е. П. Блаватская боду бөлгүмнерге кижи бодунуң энергиязын ажыглап, чүнү-даа кылып болурунуң бадыткалы кылдыр хуулгаазын чүүлдерни көргүзүп турган. Чижээ: эт-септи агаарга ужудуп, үстүүртен чечектер, чоостар дээш өске-даа чүүлдерни чагдырып, бир өрээлге олуруп алгаш, өске өрээлде чүүлдү бодунче тыртып эккээр турган болгаш оон-даа өске хуулгаазын, кижи бүзүревес чүүлдерни көргүзүп турган.  Ол бичиизинден-не өттүр көөр турган. Башкылар ону бичиизинден эгелеп хайгаарап, камгалап чорааннар. Хамык таварылгаларны бижиир болза узай бээр.

Кижилер Блаватскаяны шарлатан, мегечи, база ындыг Башкылар чок деп, бүзүревейн турганнар. Кижилерниң бүзүревези, оларның сөглээшкиннери аңаа аар-берге болуп, кадыы баксырап, аарып, каш-даа катап медерелин чидирип, өлүрүнүң кырынга кээрге, Башкылар ону экиртип турган. Адак сөөлүнде ол «Тайная доктринаның» дөрт дугаар томун чедир биживейн, чок апарган.

Е. П. Блаватскаяның соонда Елена Ивановна, Николай Константинович Рерихтер Шамбаланың Бурган-Башкылары-биле ужуражып (оларның канчаар ужурашканын биживес мен, ол узун төөгү апаар), Майдыр Бурганның «Агни Йога» деп өөредиин бижип кааннар. Башкы ону телепатия-биле ырак черден чугаалап берип турган. Баштайгы өөредигни Николай Рерих хүлээп ап турган, шупту арткан 9 өөредигни Елена Рерих хүлээп ап, бижээн. Башкы аңаа «Агни Йоганың иези» деп атты берген. Елена Рерих база бичиизинден тура өттүр көөр, Башкылар ону төрүттүнүп кээринден эгелеп, үргүлчү хайгаарап, камгалап чорааннар. Рерихтерниң дугайында моон номчуп болур силер.

Рерихтер база Индияга, Тибетке, Шамбалага чорааннар. Майдыр Бурган көзүлбес боду-биле-даа, анаа кижи мага-боду-биле-даа олар-биле хөй катап ужуражып турган.

«Агни Йога» өөредии Е. П. Блаватскаяның тарадып турганы теософия өөредииниң, «Тайная доктринаның» уланчызы кылдыр кижи төрелгетенге Башкыларның берген өөредии болур.

Өөредиг параграфтардан тургустунган, номчуурунга таарымчалыг болзун дээш, эгелерни бодум тургускан мен. Чамдык параграфтарның чүгле кол утказын дамчыдар дээш, кызырып бижээн мен. Ынчалза-даа домак бүрүзү бичии-даа өскертинмээн, оларны дорту-биле ол-ла хевээр очулдурарын кыскан мен. Мээң тайылбырым скобка иштинде.

Майдыр Бурганның өртээ чок «Агни Йога» деп үнелиг Өөредииниң кол сүүзүннүг чулуун сы тудуп, белеткээш, силер бүгүдеге сунуп, бараалгадым. Сагыш-сеткилиңерниң суксунун хандырып, эки шиңгээдип алырыңарны күзедим! Өөредигни төндүр номчуур болзуңарза, силерниң медерелиңерни аңдара тудуптар чадавас.

Киирилде сөс мооң-биле доозулган. Бурганнар Иерархиязының дугайында "Иерархия" деп өөредигни моон номчуп болур силер. Маңаа турган баштайгы үш өөредигни ап каапкаш, бо өөредигни чаа салып калдым. Бо дээрге кижи бүрүзү билген турар ужурлуг, эргежок чугула, кол өөредиг болур. Бо солун өөредигни албан номчууруңарны сүмеледим. Ынчангаш силерге шажыннар өөредиглеринде Бурганнар өөредиглерин өөренип, угаан-медерелиңерни сайзырадып чорууруңарны күзедим!

Чүгле материалистиг эртемнер өөренип, чартык угаанныг кижилер болбаалыңар. Харааданчыг чүве: шажыннар өөредиглерин хүрээ ажылдакчылары оларны ажык-кончаага ажыглаар дээш, хажыдып каапканы кончуг. Чүгле хажыдыышкын чок сарыг шажын (буддизм) эртемин база Майдыр өөредиин өөренир херек.

Өөредиглер дээрге бистиң чурттап чоруурувус көзүлбес делегейниң хоойлулары болур. А хоойлулар билбес улус канчап эки чурттаар бис. Чамдыктарывыс оларны хажыткаш, багай үүле-салым ажылдап ап, өөделиг амыдырал көрбейн чоруур бис. Боданып-ла көрээлиңер! 

Мону номчааш, таныыр улустарыңарже дамчыдарын диледим.